Minni

Ég upplifði dáldið merkilegt um daginn, ég var að keyra heim eftir fund og gleymdi að ég bý í Danmörku. Leiðin sem ég keyrði heim var orðin svo kunnugleg að ég gleymdi að ég er útlendingur. Sem þýðir að ég er orðin ágætlega "integreruð", ég er líka búin að taka eftir því undanfarið að ég pirra mig mjög takmarkað yfir "baununum" þessa dagana.
Mér finnst magnað líka hvað veður,hiti,kuldi,raki,ákveðin birta getur triggerað minningar frá Íslandi. Ég var að keyra meðfram Søerne í talsverðu roki á dönskum mælikvarða og fékk svona flashback minningu. Ég var að veiða í Þingvallarvatni með familíunni með vindinn í fangið að sjálfsögðu(það er einhvernveginn alltaf þannig við Þingvallavatn). Ég veit ekki hvað ég var gömul en þarna voru rækju og laxasalatssamlokurnar hennar mömmu í rauða nestisboxinu, mosinn, græna slímið í vatninu, heiðarsóleyjarnar og pabbi í vöðlunum að sjálfsögðu(hann þurfti að kasta fyrir mann af því að það er vita vonlaust að koma flotinu út öðruvísi. Og þetta var ekki bara minning, ég upplifði tilfinninguna að vera þarna. Ég fékk aðra svona þegar það var frost um daginn og ég ferðaðist bókstaflega aftur í tímann þar sem ég var að ganga á Eiríksjökul. Ef ég gæti bara munað allt sem ég raunverulega man og stjórnað því hvenær ég vil muna það! Ég sit á lager af frábærum upplifunum sem ég hef ekki meðvitaðan aðgang að sem er eiginlega dáldið fúlt.

nenni ekki!

Ég er að deyja úr leti, skapgerðarbrestirnir hafa sigurinn þessa dagana. Ég er dáldið undarleg að því leyti að þegar ég hef mikið að gera þá fúnka ég mikið betur, verð alveg hræðilega skilvirk. Eins og í síðustu viku þá vorum við að gera verkefni um afspændingspædagogik og geðsjúka, ég átti 3 kvöldvaktir þá vikuna og skilaði mínu í þessu verkefni , no problemo og var eiginlega bara drulluhamingjusöm. Við kynntum það á föstudaginn og fengum þvílíkt hrós! Í þessari viku fer ég fyrst að vinna á laugardaginn og er bara að dóla mér. Ég nenni ekki gera hlutina sem ég á að vera að gera og er bara að ruglast eitthvað á netinu(sem enginn hefur gott af). Er að pæla að kíkja í karate í kvöld, er með rúmlega 10 ára þráhyggju yfir því að ég gæti haft voða gaman af því en ég hef bara aldrei þorað að fara. Ég er líka að pæla að flytja bloggið mitt eitthvað annað,ég er orðin leið á blogspot

Leyndarmál lífsins

Þá er kominn vetur í Baunalandinu því miður! Ég hafði vonast eftir að sleppa þetta árið en það varð svo ekki raunin. Að keyra um á scooter er orðið gífurlega líkamlega óþægilegt, ég fæ kalsár eftir hálftíma ferð svo að það þarf að vera þess virkilega virði til að ég hreyfi mig út úr húsi. Talandi um húsið, þá eru danskar íbúðir ekki þær hlýjustu í heimi og ég geng hérna um þrælvafin í ullarteppi og ullarinniskó(ég kyrjaði í fingravettlingum í gær!). Það eina sem reddar þessu er full body size hitateppið sem ég fékk í jólagjöf frá tengdó. Ég set það undir sængina svona klst áður en ég fer að sofa og svo skríð ég undir heita sæng,æðislegt! Þetta er dáldið skrýtið með Dani afhverju þeir geta ekki fundið útúr því að einangra útveggi og gera þétt þök. Svo þegar ég hef spurt þá um þetta,þá horfa þeir á mig í forundran og segja að húsið þurfi að anda og rakinn þurfi að komast út! Afhverju þurfa hús á íslandi ekki að anda! Mér þætti vænt um að fá útskýringu frá einhverjum håndværker þarna úti.
Danmörkin er mjög ljúf á marga vegu en það er mjög fúlt að frjósa 3-4 mánuði á ári. En sumrin eru hins vegar algjört æði þannig að þetta jafnast einhvernveginn út
Minn heittelskaði er búinn að fá sér nýja vinnu, hann er að fara að vinna í öðrum klúbb og hluti af jobbinu er að passa hesta og smíða kofa. Þannig að bóndinn ætti að njóta sín þar.
Ég horfði á The Secret um daginn og hún var alveg geggjuð! Ef þig langar að vita hvað lífið snýst um þá horfðu á hana. Hún finnst á www.thesecret.tv eða þú getur downloaded henni einhversstaðar(ekki það að ég styðji svoleiðis óheiðarleika:).

Lífið er frekar notalegt þessa dagana, það er frí í skólanum í dag. Við erum að vinna í ævisögunni þessa dagana og erum að kíkja á systkinatengsl sem er mjög áhugavert. Ég er reyndar búin að uppgötva að systkinatengsl eru í rauninni jafn mikilvæg og foreldratengsl. Það hefur gífurleg áhrif hvar maður er í systkinaröðinni. Mér líður eins og ég sé ókeypis hjá sálfræðingi þegar ég er í skólanum(sem er ekkert nema sniðugt).
Sem fyrrum fjárhagslegur fáviti í bata þá finnst mér fjármál gífurlega heillandi og ég fann þessa grein um daginn.
http://articles.moneycentral.msn.com/SavingandDebt/LearnToBudget/ASimplerWayToSaveThe60Solution.aspx?wa=wsignin1.0
Hún fjallar um okkur launaseðilsþrælanna sem náum aldrei að leggja neitt fyrir og erum því alltaf háð næstu mánaðarmótum. Ég hef ekki náð svo langt ennþá að eiga varasjóð en ég stefni á það.

tölfræði

Djöfull er ég dugleg í dag, vaknaði kl 10(náði samt ekki framúr fyrr en 11, ég þarf að hugsa svo mikið), borðaði morgungrautinn,kyrjaði, dansaði,gerði yoga,hringdi í bekkjarfélaga til að finna útúr heimavinnunni(ekki það að ég nenni að lesa heima,its the thought that counts:) og svo er ég að fara á kvöldvakt á eftir. Svo er ég búin að blogga tvisvar í dag, ég tók nefnilega eftir merkilegri tölfræði áðan. Ég bloggaði 55 sinnum árið 2006 og 73 sinnum 2005 og ég byrjaði að blogga í maí 2005. Þannig að það var rúmlega helmingi meiri framleiðni 2005 en 2006. Þetta gengur nú ekki! Ég verð að taka mig á!

brumm

Það gengur eitthvað illa að snúa sólarhringnum við eftir jólin, að vakna fyrir 12 er bara eins að sé verið að murka úr mér líftóruna. En á morgun er engin miskunn, þá þarf ég að mæta kl.9 í skólann.
Ég fékk góðar fréttir eftir að við komum heim, tryggingarfélagið ætlar að gefa mér nýjan scooter afþví að hinn er ónýtur og almættið gaf mér tvöföld laun þennan mánuðinn þannig að ég get ekki kvartað. Minn heittelskaði fann nýjan scooter handa mér á netinu og keypti hann í gær. Sá nýji er mikið kraftmeiri en sá gamli þannig að slysahættan eykst til muna. Brumm brumm! Ég hendi inn mynd við tækifæri, ég hef tekið eftir að fólk upplifir okkur hálf geðveik að vera ferðast á þessu en þetta er þvílíkt gaman. Við fengum alveg frábæra hugmynd í gær, minn heittelskaði hafði heyrt af manni sem hafði keyrt til Parísar á 7 dögum á scooter. Við ætlum að taka roadtrip eitt sumarið um Evrópu í mánuð og sjá hvað við náum langt. Við getum ekki keyrt hraðar en 60 og megum ekki keyra á hraðbraut þannig að við tökum það mjög rólega. Guð hvað þetta verður rómantískt,ég sé þetta fyrir mér í hyllingum,keyrandi um í franskri sveitasælu og stoppandi í lunch á local veitingastaðnum. En ég held að við byrjum á því að fara til Mön eða Bornholm(danskar eyjur) og sjá hvernig gengur. Ég skammast mín eiginlega dáldið,ég er búin að vera hérna í eitt og hálft ár og hef ekki ennþá náð að komast útúr Sjálandi.
Í Danmörkinni er ylvolgt og dejligt, 10 stiga hiti uppá hvern einasta dag, svona á vetur að vera!

Litið um öxxxlll!

Gleðilegt árið öllsömul og ég vona að þið hafið haft það gott yfir hátíðarnar. Ég er ennþá að jafna mig eftir ofátið og fer á detox/grænmetisfæði í janúar svona til að sjokka líkamann ennþá meira. Ég hef verið að kíkja á árið sem leið og þar stendur uppúr íbúðarkaup, byrja í skóla og flutt þrisvar yfir árið(sem var ekki gaman en hefur þau frábæru áhrif að ég er búin að henda öllu sem ég get lifað án). Ekkert clutter á mínu heimili sko!
Svo galdraði minn heittelskaði nýtt eldhús fram úr vinstri erminni þannig að hann vinnur eiginmannsverðlaunin í ár. Það var æðislegt að koma á klakann í smá hvíld, það er líka mjög gott að fá smá fjarlægð á lífið úti og sjá hvernig ég get gert hlutina betur. Ég er búin að skrifa ásetningana fyrir þetta ár og ætla að einfalda hvernig ég geri hlutina. Ég stefni að hafa nógan tíma þetta árið til að gera það sem skiptir máli og það snýst bara um mitt viðhorf og líka að njóta lífsins meira. Ég er að gera mjög skemmtilega og spennandi hluti og engin ástæða til að njóta þess ekki meira en ég hef gert. Ég hef góða tilfinningu fyrir þessu ári, þetta kemur til með að verða æðislegt. Ég var á búddafundi í kvöld sem var algjört æði,þetta gefur svakalegt power. En talandi um ásetninga, ég fann ásetningana frá því í fyrra og ég gerði ekki rassgat í þeim á árinu, ég gerði helling af öðrum góðum hlutum en ekki það sem ég setti mér. Það er greinilega satt að ef maður segir frá ásetningunum þá gerir maður það ekki(það er allavegana mín afsökun). Þannig að ásetningar 2007 fara ekki á netið í ár.
Við fljúgum til Baunalandsins á fimmtudaginn og ég er farin að hlakka til, ég get ekki beðið eftir að byrja í skólanum á föstudag. Núna er ég úthvíld og klár í slaginn aftur

Homebase

Þá er ég lent hjá mömmu í jólasæluna. Ég er búin að eiga dáldið viðburðarríka viku. Afar kurteis maður gerði heiðarlega tilraun til að bakka yfir mig á þriðjudaginn. Hann náði reyndar bara scooternum og skemmdi hann dáldið. Minn heittelskaði varð gífurlega glaður(ekki misskilja samt, hann varð ekkert glaður yfir að fólk reyni að keyra yfir mig, það verður fyrst eftir að hann er búinn að líftryggja mig:) og vonast eftir að fá nýjan scooter handa mér útúr tryggingunum. Ég kíkti á Vagn afa á miðvikudag og fékk kaffi, svo var julefrokost í skólanum og tjúttaði fram eftir nóttu. Klakinn tók á móti mér með milljón metrum á sekúndu,við áttum þá verstu lendingu sem við höfum upplifað, vélin hrundi niður á flugbrautina. En ég skildi það alveg svosum þegar ég sá veðrið, við vorum heppin að það var yfirhöfuð hægt að lenda, við hefðum getað lent á Egilstöðum. Ég át á mig gat á jólahlaðborðinu í Perlunni á fimmtudaginn, þvílíkt og annað eins gúmmelaði, dádýrasteikin var algjört æði. Ég hef ekki verið með gemsann í lagi síðastliðna tvo daga og hef notið þess í botn að taka frí frá honum. Fólk hefur reyndar bent mér á að ég þurfi nú ekki að hafa kveikt á gemsanum núna þegar hann er kominn í lag en ég er fíkill og er algjörlega um megn að hafa ekki kveikt á gemsanum. Ég er með 693-0444.
Það komust ekki út jólakort þetta árið vegna aumingjaskapar og leti. Gleðileg jól og farsælt komandi ár til ykkar allra og ekki vera að fara á einhvern bömmer yfir þessu. Við elskum ykkur ennþá þó að við sendum ykkur ekki jólakort. Knús á línuna

Menn eru orðnir ágætlega örvæntingafullir þegar þeir eru farnir að hakka sig inn á bloggsíðuna mína og segja fréttir af mér óspurðri. Ég var nú reyndar ekki búin að fatta hvað það er langt síðan ég bloggaði, þetta er persónulegt met. Og það hefur nú ekki verið það að ég hef ekki haft neitt að segja, ég hef bara ekki haft tíma til að skrifa það niður. En nú er þetta að verða búið,eitt verkefni eftir , þar að segja ævisagan. Það er dáldið fyndið þegar ég er búin að pressa 30 árum niður á 12 síður þá virkar líf mitt eins og eitt season i Days of our lives. Þvílík og önnur eins dramatík, svo virka ég mikið ruglaðri á pappír en ég man það inn í hausnum á mér. En svona er þetta, ég þekki engan sem hefur lifað sléttu og felldu lífi þar sem allt var æði alltaf. En ég þekki aftur á móti fullt af fólki sem reynir að láta sem að lífið sé alltaf í lagi. "Ég hef það fínt" Alltaf!!!
Ég fór í jólainnkaup í dag með Betu systur og náði næstum því öllum jólagjöfum sem er talsvert afrek miðað við að hálf sænska þjóðin og 1/4 af íslensku þjóðinni var að gera það sama í Strikinu í dag. Ég fann líka diskahilluna sem okkur vantaði og núna er eldhúsið hrein fullkomnun!
Ég á tvo skóladaga eftir, eitt verkefni, tvær kvöldvaktir og einn julefrokost í skólanum. Eftir það get ég sest upp í flugvél á fimmtudaginn og slappað af. Ég hlakka til að fara í Perluna á fimmtudagskvöldið á jóla hlaðborð og chilla með familiunni yfir jólin. Það verður algjört æði!

Undskyld mine kone ikke skriver !!!!

Hej Anders her, jeg har "hacket" mig her ind på Ásdís blog for at fortælle jeg lidt, så I kan følge med. og ja hun skriver sku for lidt !!!!!!

Ásdís har travlt for tiden, mest med skolen og arbejdet. Hun har lige haft en samtale på skolen hvor eleverne for en slags feedback fra lærerne om hvordan det går, og hun fik en masse ros. Det er jo klart hun er jo super elev, hvad skulle de ellers sige.
Hun er ved at være færdig med en stor opgave om sin livshistorie, som lyder som om det har været spændene men også et stort arbejde.
Ellers glæder hun sig helt vildt til at komme til Island, lige nu er hun ude og shoppe julegaver med Elo.
Anders over and out

Bond

Ég er bara helvíti ánægð með nýja Bondarann, þetta var eiginlega sú besta Bond mynd sem ég hef séð lengi. Það var mikið að þeir gerðu mynd eftir bókinni, yfirleitt hafa þeir stolið titlinum og skáldað svo í eyðurnar. Í þessari þá náðu þeir að fylgja söguþræðinum nokkurn veginn, ég er einlægur Fleming aðdáandi og á allar Bond bækurnar og það er nú þrátt fyrir að Fleming hafi verið argasta karlremba og kvenfyrirlítari. Bondinn í þessari mynd er líka grófari og meira rough týpa en áður hefur sést og það er hann nefnilega í bókunum. Og svo spillir ekki að nýji bondinn er búinn að vera MIKIÐ í ræktinni og er alveg hellings ber að ofan í myndinni. Þannig að það er eitthvað fyrir alla.
By the way þá er ég komin með nýtt heimanúmer fyrir löngu síðan 58590044

flensborg

Ligg í sjálfsvorkunn með hita og kvebb en get þó glatt mig yfir minni eigin smekkvísi. Dúkurinn er kominn á gólfið og hann er geðveikt flottur. Þannig að þetta er eiginlega bara búið og það er ekki mér að þakka, það er minn heittelskaði sem er búinn að standa fyrir þessu öllu saman. Það er gott að eiga svona duglegan håndværker eiginmann.
Við ætlum að halda upp á þetta með að skreppa á nýja Bondarann um helgina, við höfum ekki farið á bíó í milljón ár(þegar maður er með 40 sjónvarpsstöðvar þá minnkar þörfin fyrir bíó).
Mér hefur fundist nóvember erfiður með skóla, vinnu og eldhús og svo framvegis og það er aðallega af því að ég er ekki góð í að skera niður í félagslífinu eða segja nei við aukavinnu. Og ég hef farið flatt á því áður að yfirplana mig og ætla svo mikið og fatta bara ekki hvar mín takmörk liggja. Það fór ekki vel á sínum tíma og tók mig marga mánuði að jafna mig andlega og líkamlega. Besta vinkona mín minnti mig á þetta í gær(takk elskan) og ég ætla að minnka verulega við mig. Ég verð að gera það af því að það er haugur af verkefnum fram að jólum og ég er orðin drulluþreytt á því að koma ólesin í skólann af því að ég hef ekki tíma. Það er helvítis bömmer að vera veik núna því að grúppan mín á að leggja fram verkefni á morgun og þær verða að gera það án mín.
Ég var í ræktinni á þriðjudaginn í fyrsta skipti í tvo mánuði og það var mjög fríkað. Ég gat hlaupið í 30 mín á hlaupabrettinu án þess að blása úr nös. Þetta gat ég ekki fyrir 2 mánuðum, ég skil þetta ekki alveg. Ég fór líka á vigtina og er búin að léttast um 3 kíló! Að fara ekki í ræktina svínvirkar greinilega!

Malmú!

Skrapp til útlanda um helgina og heimsótti nágrannaþjóðina. Malmö var alveg jafn hugguleg og síðast og kaffið var alveg jafn gott og seinast. Ég næ þessu ekki með kaffið, hvað eru Svíar að gera við kaffið þarna hinum megin við sundið? Ég hreinlega uppljómaðist yfir cafe latteinu mínu það var svo gott. Ég opna kannski bara sænskt kaffihús hérna og verð geðveikt rík.
Ég átti bágt með mig og þurfti að halda fast í budduna. Þarna gat maður eytt alveg helling af pening í jólapunt og dót fyrir heimilið. En ég stóðst þrekraunina og hélt mig við budgettið(en ég keypti diskamottur, gat ekki annað).
Eldhúsið gengur vel, dúkurinn fer á í dag og þá kemur næsta projekt á dagskrá, að gera skrifstofuna mönnum bjóðandi. Og svo ætlum við að halda housewarming þann 9. des svo við getum montað okkur af nýja eldhúsinu.

E-efni

Ég er að sjá fyrir endann á eldhús vitleysunni. Það verður hægt að vaska upp og jafnvel elda mat um helgina, jibbí! Uppþvottavélin kom í gær þannig að nú hefst nýtt tímabil í hjónabandinu. Hér eftir verður ekki hægt að rífast um hver á að vaska upp! Við erum búin að vera eldhúslaus núna í 3 vikur og erum búin að lifa á frönskum, pizzum og öðrum tilbúnum réttum. Maginn á mér er farinn í verkfall og vill fara á hráfæði. Hann er búinn að fá fleiri E-efni síðastliðnar 3 vikur en síðustu 3 ár. Það kom mér ótrúlega á óvart þegar ég var að versla allt junkfoodið hvað það er ódýrt. Það er t.d hægt að fá hálft kíló af frönskum fyrir 70 kall ísl. og pizzu fyrir 100 kall. Það er hægt að verða alveg ótrúlega feitur fyrir engan pening. Það er kannski þessvegna að Danir eru að hrynja niður úr offitu, þeir eru of nískir til að gera annað.
Minn heittelskaði er með flensu og hálsbólgu þessa dagana en ég held að þetta sé E-efna eitrun.
Nýja eldhúsið er rosalega fallegt, það var sett borðplata á í gær og sagað fyrir vaskinum. Svo kemur píparinn á morgun þannig að það ætti að vera hægt að vera þarna inni í næstu viku. Myndirnar koma seinna, myndavélin er í viðgerð
sayonara

Rass

Síðasti föstudagur var mjög interessant í skólanum. Ég fékk að pota í rassvöðvana á öðru fólki og það var potað í rassvöðvana á mér. Rass er vanmetið fyrirbæri, þetta var hið áhugaverðasta mál. Svo fengum við jiu jitsu kennslu í hádeginu og þar kenndi jiu jitsu gúrú bekkjarins okkur fantabrögð sem var ógeðslega gaman. Núna hálfvorkenni ég þeim sem mæta mér í dimmu sundi.
Operation "Eldhúsendurnýjun" gengur vel, við fengum rafvirkja um helgina sem fór hamförum upp um alla veggi og við náðum að ryðja gamla eldhúsinu út á ruslahaug. Ég er svo fegin að losna við þetta eldhús út úr íbúðinni, það var svo greasy og ógeðslegt. Maður gat fundið steikingarlyktina af frikadellum og fiskefiletum 30 ár aftur í tímann, ojbara!

Bavíanar

Þetta er búin að vera geðveik helgi, ég er búin að vera vinna eins og bavíani. Ég tók tvöfalda vakt á föstudaginn,dagvakt á gamla staðnum og kvöldvakt á nýja staðnum og svo er ég búin að vera helgina á gamla staðnum plús að standa í framkvæmdum heimafyrir og ég tala nú ekki um heimavinnuna. Minn heittelskaði er búinn að vera á útopnu hérna á heimafrontinum, setja saman skápa, brjótandi niður veggi og þar fram eftir götunum. Við erum komin með hurðargat frá eldhúsi inn í stofu og það er flottara en við vorum búin að reikna með. Það gefur mikið meira ljós í íbúðina og gerir hana stærri á alla vegu. Næsta verkefni á dagskrá er svo að ráðast á eldhúsinnréttinguna. Við dugleg!

Áfram með forfeðrapælingar!
Hann ,Ólafur afi missti mömmu sína 1 árs gamall og var settur á sveitina og var síðan komið fyrir á hinum og þessum bæjum sem áttu ekki nógu mörg börn til að þræla út. Hann fékk takmarkaðan kærleik, barinn reglulega og lítið sem ekkert að borða. Samkvæmt öllum viðurkenndum uppeldis og sálfræðibókum miðað við þetta uppeldi(eða miseldi) þá hefði Ólafur afi átt að vera argasti psykopati eða að minnsta kosti alki. En nei, Ólafur afi var góður kall sem kom með flugelda handa barnabörnunum á gamlárskvöld og forðaði þeim frá því að borða augun,eyrun og alla aukahúðina(sem enginn vill) á sviðunum. Geri aðrir betur! En kannski vorum við systurnar of vel aldar , ef við hefðum verið sveltar dáldið þá hefðum við étið eyrun með bestu lyst.

afmælispóstur!

Já, hún uppáhaldsmóðir mín á afmæli í dag(ekki það að ég eigi margar), þetta er nú reyndar afmælisvika í familíunni. Erna systir átti afmæli á síðasta sunnudag og Lilja amma átti afmæli síðasta þriðjudag þar að segja ef hún væri enná lífi. Ég er í 100% framför með með að muna eftir afmælisdögum þetta árið,ég náði að hringja í litlusystur sama dag og hún átti afmæli. Því náði ég ekki í fyrra! þannig að það er þvílíkur success. Maður verður að gleðjast yfir litlu hlutunum í þessu lífi. Ég verð að leggja mig extra mikið fram við svona hluti þetta árið því að ég fer heim um jólin. Familían verður að vera í stuði til að elda oní mig stórsteikur og hangikjöt og så videre.
Ég stend í miklum forfeðrarannsóknum útaf verkefni í skólanum og það er ekkert skrýtið að ég sé svona skrýtin. Ég kem af gífurlega þjáðu fólki langt aftur í ættir, sultur, sjúkdómar, alkóhólismi og ungbarnadauði nema náttúrulega einn forfaðir minn sem var hirðstjóri yfir Íslandi sem hann leigði af Noregskonungi í 3 ár fyrir slikk. Ég geri ráð fyrir að hann hafi fengið nóg að borða.

nååhh!

Jæja, þá er að taka sig saman í andlitinu og fara að blogga aftur. Ég fór á menningarnótt í gær, við hjónin byrjuðum á nútímalist frá Miðausturlöndum, það var mjög boring, of nútímalegt fyrir minn smekk. Svo fórum við á kirkjutónleika með renaissancetónlist og það var einfaldlega himneskt, gæsahúð,hrollur og allur pakkinn. Og tónleikarnir voru í uppáhaldskirkjunni minni, Marmor kirke, það er mjög sérstök stemming að vera þar inni, ég hef á tilfinningunni að Guð komi oftar við þar en í öðrum kirkjum. Svo kom röðin að gospeltónleikum í annarri kirkju, og mér fannst það bölvaður hávaði eftir hina tónleikana en minn heittelskaði halelújaði sig alveg í tætlur. Ég gafst upp og fór á kaffihús með Betu systur á meðan halelújahávaðinn var að klárast.
Skólinn er alveg frábær, ég náði loksins einhverri yfirsýn yfir þetta allt saman í vikunni. Einnig fékk ég tækifæri sem 1.árs nemandi að eyðileggja nokkur börn í síðustu viku. Við fórum að kenna 11 ára gömlum grislingum um líkamann og þau bíða þess örugglega aldrei bætur(svona er þetta að senda fólk út sem er búið að vera 1 mánuð í námi út að gera eitthvað). En þetta reddast örugglega fyrir þau ef þau taka rispu hjá sjúkraþjálfara og sálfræðingi í nokkur ár.

Joggingskólinn hluti 1

Mitt stærsta problem í dag er að ég á ekki nógu margar joggingbuxur, skólinn er afslappaðri en allt sem afslappað er! Það er bara jogginggallinn á morgnana og svo greiðir maður sér ef maður ætlar vera extra fínn þann daginn. Ég meira að segja fór í skólann í seinustu viku án þess að setja á mig maskara, pælið í því!Fyrsta vikan með nýju fólki og maður er það afslappaður að maskarinn gleymist! Hérna fínn ég virkilegan mun á íslensku og dönsku skólakerfi. Við gerum verkefni sem við skilum ekki inn, ræðum alveg svakalega mikið um málin og þetta fjallar mest um það að upplifa sjálfan sig og skrifa sig og sínar tilfinningar niður. Ég náttúrulega íslendingur spyr alltaf "hvenær eigum við að skila þessu?" Og þá fæ ég yfirleitt svarið "nei nei ekkert vera að því,þetta er fyrir þiiiiig!"! Þessu þarf víst að venjast.

Þá er fyrsti í skóla búinn, ég byrjaði í anatómíu í morgun og skildi mjög takmarkað það sem fór fram þar. Dönskulatínan mín er nebnilega helvíti ryðguð en þetta hlýtur að koma. Bekkurinn er hið vinalegasta fólk upp til hópa og var ekkert nema liðlegheitin. Skólinn er á frábærum stað, eiginlega út í skógi ,við stöðuvatn og umkringdur epla og perutrjám, þvílík huggulegheit. Mötuneytið fær líka toppeinkunn! Svo fékk ég þær gleðifréttir að það eru ekki próf um jólin,heldur í vor og það hentar mér mjög vel. Hérna er linkurinn ef þið viljið skoða http://www.skolenforpsykomotorik.dk/. Svo er ég í frí á þriðjudögum og þá fer ég að vinna.
Draumur í dós!

I did not see that one coming!!!

Vá mar!!!
Ég fékk alltí einu inní skólann sem vildi mig ekki, þeir hringdu í gær og buðu mér pláss. Það datt einhver út, allir á biðlistanum voru uppteknir við eitthvað annað ,guð sé lof og þá kom bara röðin að mér!! Ég tala við yfirmanninn í vinnunni og hún er svo stórkostleg að að hleypa mér í skólann strax á mánudaginn(þó að hana vanti geðveikt starfsfólk). Ég er barasta að fara í háskóla í næstu viku, rosalegt!! Þegar það gerist þá gerist þetta hratt, mér líður eins og ég hafi fengið eldingu í hausinn. jíbí jei,jíbbí jei, djöfull er þetta æðislegt líf!!!!

Dugleg!

Búin með seríu 5, bara ein eftir!

Sexfíkill

Mér er um megn að stjórna Sex and the city fíkninni þessa dagana. Ég fékk nebnilega kassa með öllum seríunum í afmælisgjöf og ég er algjörlega stjórnlaus. Get ekki gert neitt hérna heima nema að brjóta saman þvott(og þá bara ef hann liggur í sófanum fyrir framan imbann). Ég meika það varla að fara út úr húsi á fundi. Ég hef fengið ráðgjöf hjá nokkrum aðilum og mér líst eiginlega best á tillöguna sem hún systir mín elskuleg kom með. Hún sagði að ég ætti bara að klára kassann og þá get ég farið að lifa eðlilegu lífi aftur. Ég er komin í 4 seríu ,disk 3 þannig að það er ekki svo mikið eftir. Þetta er kannski ekki sú mest agaða leið sem ég gæti farið en hún er skemmtileg:) Ég get örugglega verið búin á mánudag ef ég er mjög hömlulaus.
Ég fékk þessa þvílíku martröð í nótt, minn heittelskaði hljóp á eftir mér með hníf og ætlaði að drepa mig og að fela svo líkið útí skógi! Ég slapp naumlega með skrekkinn og var að reyna að segja fólki hvað hafði skeð og það trúði mér enginn. Nú má einhver taka fram draumaráðningarbók og að láta mig vita hvern djöfullinn þetta þýðir. Vinn ég í lottó eða er Anders Hannibal Lecter í rauninni? Endilega láta mig vita hvort það er! Þá get ég gert viðeigandi ráðstafanir,t.d að fara að sofa með annað augað opið!
Himininn yfir Köben var æðislegur í dag , brjálæðislega blár himinn með renaissance málverka skýjum. Lífið er bara helvíti gott í dag. Guð blessi ykkur!

kvebb

Ég fékk svo mikið áfall við komuna til Baunalandsins að ég lagðist í kvef og hálsbólgu, ég hef náð mér í danska sýkla í flugvélinni. Beta og Mikkel voru hér í gærkvöldi að horfa á ísland-Baunar og ég komst að þeirri niðurstöðu að fótbolti er aldrei skemmtilegur ekki einu þegar manns eigið föðurland er að spila. Svo við Beta þrautskoðuðum HM listann í staðinn! Og ég er ekki að tala um HM í fótbolta.
Ég keypti Draumalandið eftir Andra Snæ og las hana í flugvélinni, hún er algjör snilld. Hann hittir svo naglann á höfuðið, ég hló upphátt allan tímann og fólk var farið að glápa á mig í vélinni. Þetta er must-read fyrir alla Íslendinga.
Ég er í trylltri frestunaráráttu þessa dagana og það er ekki gott. Ég er að fresta því að finna mér annað jobb og og ligg í sex and the city safninu mínu í staðinn. Ekki vænlegt til vinnings!

Enginn veit hvað átt hefur fyrr en hann hefur búið í Danaveldi í eitt ár.

Jæja nú er þetta búið, seinasta heimsóknin búin og búið að njóta baðkarsins hennar mömmu í síðasta skipti. Ég er algjörlega agndofa yfir því að ég hafi hreinlega ekki "séð" Ísland fyrr en núna. Þetta er fallegasta land í heimi og ég þurfti að stinga af til Baunalandsins til að sjá það. Þessi ferð er búin að vera frábær, ég fór með Ernu frænku í bíltúr austur í Biskupstungur í berjamó og að skoða nýja sumarbústaðinn. Síðan enduðum við í mat hjá Ingu frænku í Reykholti og svo áttum við æðislega huggulegt kvöld út á palli fyrir framan kamínuna. Og ég féll algjörlega fyrir Reykholti, ég byggði einbýlishús þar í huganum og fannst það passa fínt, þetta er merkilegt ástand, mér fannst meira að segja Hellisheiðin algjörlega ómótstæðileg og þar hef ég keyrt milljón þúsund sinnum yfir ævina og aldrei fundist hún neitt sérstaklega spes fyrr en núna. Ég ætla ekki einu sinni að fara út í þessa stórkostlegu fjallasýn í kringum Rvk, maður þarf ekki einu sinni að fara út úr bænum.
Ég ætla rétt að vona að Íslandssýkin rjátli af mér eftir að ég kem til baka í hversdagsleikann úti.
Ég hef náð að hitta vel flesta sem ég ætlaði mér í þessari ferð og það hefur verið frábært að endurnýja kynni og finna að það breytist ekkert við smá fjarveru. Ég var reyndar að átta mig á hvað ég elska mikið af fólki og náði að telja upp í 62 manns sem ég elska út af lífinu. Og það er þá með þeim fyrirvara að ég er að gleyma alveg helling! Ég dugleg!
takk fyrir mig í þetta skipti og hafið í huga að þó að lífið sé kúkur suma daga þá gæti lífið verið kúkur á ljótari stöðum en Íslandi!

Berjamó?

Ég er alveg búin á því, það er búið að vera stanslaust prógram síðan ég kom ,alveg gegndarlaust lambakjötsát og kaffidrykkja. Ég held ég sé búin að drekka ársskammtinn af kaffi en þetta þarf bara ef amma ásdís á að vaka fram yfir miðnætti.
Ég er svo skotin í Íslandi að ég get ekki farið til Köben á morgun. Ég er búin að framlengja miðann fram á föstudag! Hver vil koma í berjamó?

Ilmurinn!

Það er góð lykt af Íslandi í dag, ég væri til að pakka niður ferska loftinu og hafa með mér til Köben. Svo fann ég krækiber og hrútaber í göngutúrnum. Namm Namm

30

jæja þá er maður orðinn þrítugur, sem er bara ekkert nema jákvætt. Núna man ég allavegana hvað ég er gömul!. Ég átti æðislegan afmælisdag sem byrjaði á sundferð, svo var klipping og svo kíkti ég á gamla vinnufélaga og félaga. Svo fékk ég langþráð lambalæri í matinn! Það gerist ekki betra.
Ég finn fyrir því að ég er búin að danskast dáldið, mér finnst íslenskir fréttamenn alveg hryllilega skýrmæltir og þegar ég er að keyra þá er ég alltaf að passa mig á hjólreiðamönnunum sem af einhverjum ástæðum láta ekki sjá sig:). Mér finnst æðislegt að vera hérna og það er svo nice að sjá langt frá mér, sjá fjöllin og sjóinn. Geggjað! Eins og alltaf er ég búin að yfirbóka mig, ég ætla mér að sjá alla á þessum stutta tíma og það er ekki alveg að gera sig.

Jibbí!!!!

Ég fékk þá bestu ammilisgjöf sem ég hef nokkurn tímann fengið. Minn heittelskaði gaf mér flugmiða til Íslands í afmælisgjöf þannig að ég kem á klakann á miðvikudaginn!!!! Ég ætla í sund, á american style, fá mér ýsu, fara á rúntinn, horfa á Esjuna og draga djúpt andann! Ég hlakka geðveikt til! Rosalega er gott að vera vel gift!

Til hamingju!

Það er kominn ákveðinn haustfílingur í Baunalandi, fór í sokkum og inniskóm í vinnuna í daga(það er reyndar guðlast hér í landi samkvæmt mínum heittelskaða). Mér fannst það ágætis málamiðlun, það er of heitt til að vera í alvöru skóm og of kalt fyrir að vera berfætt í sandölunum. Ég er komin með nýtt plan og er búin að skrá mig í skóla. Ég ætla að gerast "healingmassør" og ég byrja á fyrsta námskeiðinu í nóvember. Þetta verður þannig að ég tek 5 daga kúrsa svona annan til þriðja hvern mánuð og verð að vinna á meðan. Ég er að leita mér að nýrri vinnu þannig að ef þið vitið um eitthvað svaka skemmtilegt þar sem maður þénar fullt af peningum endilega láta mig vita.
Ljónynjan hún Guðmunda á ammili í dag, hún er þrítug í dag! Til hamingju með daginn krúttið mitt!

Vitrun!

Fór í heimsókn til vinkonu minnar um daginn og fékk smá vitrun um framtíðina. Er að vinna í henni, það skýrist betur í næstu viku. Það er búið að rigna talsvert upp á síðkastið og það hefur verið mjög huggulegt, ég var orðin ágætlega þreytt á sólinni. Fór meira segja í sokkum í vinnuna á mánudaginn, það hefur nú ekki skeð síðan í maí!

blah

Ég er eitthvað fúl og eirðarlaus í dag og var í leiðinlegu vinnunni minni (leiðinleg vinna =updeita íslenskan læknagagnagrunn). Ég held meira segja bara að ég hætti í leiðinlegu vinnunni. Tilgangurinn með þessari vinnu var að hafa hana með skólanum(þægilegur vinnutími plús góð laun) og ég komst ekki inn í skólann þannig það er þannig séð engin ástæða til að píslarvottast hér meir! En yfirmaðurinn er í fríi og þá fæ ég að fresta uppsögn um viku. Frestun er víst góð fyrir sálina(þá getur maður notið kvíðans aðeins lengur).
Er ekki búin að fatta nýja planið ennþá, ég sit ennþá í rústunum af gamla planinu sem klikkaði og pæli í því hvern djöfullinn fór úrskeiðis
Fór með lillesøster og Bentinum til Malmø í Svíþjóð í gær og brenndi þessum ósköpum af hitaeiningum af því að þau labba hraðar en ég. Það var mjög gaman, allt ódýrara og sá allra besti caffe latte sem ég hef nogensinde fengið. Algjörlega himneskur kaffibolli! Það er alveg þess virði núna að skreppa til Svíþjóðar fyrir kaffibolla. Svo eru fötin stærri í Svíþjóð af einhverjum orsökum, ég passaði í medium og small sem ég hef nú ekki gert síðastliðin 10 ár. Sjálfsmyndin hefur gott af því að versla hjá Svíunum.
Ég er með heimþrá þessa dagana og fæ hana yfirleitt þegar koma gestir frá klakanum. Ég sé klakann í rósrauðum bjarma núna og er búin að þróa með mér jákvætt viðhorf til lífsgæðakapphlaups, verðtryggingar, vinnualkóhólisma, verðbólgu og skítaveðurs! Eins og þið sjáið þá er ég ekki með öllum mjalla í dag!

Vonbrigði ársins!

yes, þeir vildu mig ekki inn í skólann sem er nú algjörlega fyrir ofan , neðan og til hliðar við minn skilning. Ég var ægilega sár í nokkra klukkutíma. Það hlýtur þá að vera betra plan í gangi en það sem ég var með( ég var samt með helvíti gott plan:(
Þá er að snúa sér að næsta máli á dagskrá, finna sér nýja vinnu og reyna fatta hvað í andskotanum þetta nýja plan er eiginlega.
Sayonara!

Jæja þá er ég komin úr hýði aftur, ég gæti svosem reynt að kenna góðu veðri um að ég nenni ekki að blogga en það er bara léleg afsökun. Talandi um gott veður þá er bara gott veður alltaf!! Þetta er skrýtið fyrir íslending að hafa sama veðrið á hverjum einasta degi, þetta er bara eins og að búa á Spáni. Það er annars allt heitt og gott að frétta. Það eru 11 dagar í að ég fái bréf frá skólanum og ég bíð spennt. Við erum búin að fá grænt ljós á að kaupa íbúðina sem við erum í núna sem er æði. Þá hefjast sko framkvæmdir skal ég segja ykkur! Það verða máluð loft, nýtt eldhús, nýtt bað og ný stofa. Vala Matt getur alveg óhætt komið í heimsókn í október

sumar

Ég elska þennan árstíma í Baunalandinu, kirsuberin og jarðarberin eru mætt á svæðið. Og það eru alvöru sæt jarðarber ekki þetta súra drasl sem maður fær á Íslandi. Svo eru plómur, melónur, ananas og svo framvegis mmmmm!!! Þannig að það eru ávextir í hvert mál þessa dagana , sem passar ágætlega við sumarveðrið. Ég er orðin svo aðlöguð þessu sumri hérna að mér verður bara kalt í 20 stiga hita. Ég er búin að vera í grillpartíum alla helgina og slappa af. Við fórum á ströndina í Tisvildeleje á föstudaginn og vorum svo í heimahúsi í Helsinge, ég var með stelpunum í vinnunni og ég hló svo mikið að ég er ennþá með harðsperrur í kjálkunum. Talandi um harðsperrur, ég er byrjuð í ræktinni til að vinna á majónesbumbunni minni. Ég er spennt að sjá hvort ég nái að vera lengur en í mánuð, það er nefnilega metið! En maður verður að vera vongóður í þessu lífi, það þýðir ekkert annað!

Sugababes!

Fór á tónleika með Sugababes í gærkvöldi og þær voru þrusugóðar. Ég er búin að vera pínu fan í smá tíma og það kom mér á óvart hversu góðar þær eru live. Þær voru með sitt eigið band og það var ekkert playback í gangi. Ég sá í dag í blaðinu að Eivör páls er hérna með tónleika á fimmtudaginn og ég lýsi eftir baunabúa til að fara með mér, hún er æði.
Staðan í Baunalandinu í dag er sú að það er 19 stiga hiti kl.9 á morgnana og það er ágætt skal ég segja ykkur. Og það verður hitabylgja í næstu viku þannig að mér ætti ekki að verða kalt.
Ég hef lengi verið á pirruð á reykingarfíkn Baunana og ég hef engan tolerans fyrir þessu bulli. Ég sæki þessi 3 kaffihús í Köben sem eru reyklaus eins mikið og hægt er. Reykingar á almannafæri eru mesta sjálfselska í heimi. En þetta er allt að koma, það er stór kaffihúsakeðja hér í bæ sem er búið að lýsa sig reyklausa þannig að ég hef fleiri staði til að fara á núna. Ég var boðin í afmæli í kvöld og það var góður matur og félagsskapur. En við hjónin fórum heim fyrir desert af því að við meikuðum ekki reykingarnar. En þetta breytist hægt og rólega hérna, þeir eru í gangi með að fara að banna reykingar á vinnustöðum og þá kemur þetta.

Ég komst í vinnuna á síðasta mánudag heil á húfi þökk sé lestarkerfinu. Ég er orðin fín í hnénu svo að mér hefur ekki tekist að skemma neitt mikilvægt. En þetta kostaði mig viku frá vinnu og mér tókst að gera einfaldlega ekkert af viti hérna heima fyrir(enda engin ástæða til). Það var reyndar einn jákvæður póll í þessu, þegar ég kom aftur í vinnuna þá var hún frú R. svo glöð og þakklát að sjá mig að hún hefur ekkert verið óþolandi í þessari viku(og þetta er eldri kona sem mig langar að kæfa með kodda svona einu sinni í viku). Ég ætti kannski að gera þetta reglulega, mæta ekki hjá henni í viku og þá verður hún svo auðveld viðureignar eftirá.
Pétur vinur okkar er búinn að vera í heimsókn hjá okkur og við erum búin að leika túrista út um allt. Við kíktum í anddyrið á einu nýlistasafni, tveimur höllum og einni dómkirkju. Það er ekki að við séum svona yfirborðskennd, við vorum of nísk fyrir nýlistasafnið og allt hitt var lokað. En við erum allavegana búin að sjá framan á fullt af byggingum. Svo fórum við á smörrebröd stað í gærkvöldi, svona ekta danskan, mjög gott en það vall majones út úr eyrunum á mér eftir á. Þetta er afar mikið feitmeti, það er ekkert skrýtið að Danir séu feitir.
Fór á X-men og hún var ekkert spes, það eina sem gerir hana þess virði að sjá hana eru vöðvarnir á Wolverine!

Hvað meinaru!

Ég lenti í slysi númer 2 í gær annan mánudaginn í röð, rann til í bleytu og tók svona Tom Cruise, Mission impossible 3 fall af hjólinu, mjög dramatískt. Mér er hreinlega ekki farið að standa á sama hérna, ég er búin að vera með bílpróf í 12 ár og aldrei lent í neinu fyrr en núna og það eru 2 vikur í röð. Og ég meiddi mig á sömu stöðum í seinustu viku bara aðeins meira í þetta skiptið. Núna er ég með bólgið hné(sömu megin og sama hné og í síðustu viku) og fasta öxl þannig að ég kemst ekki í vinnuna. Það fyndna er að ég var á leiðinni heim til að kaupa lestarmiðann af því ég er svo leið á að keyra þetta. Svo núna verður hann pottþétt keyptur eða ég verð að hætta að mæta í vinnuna á mánudögum(sem er ekki slæm hugmynd). Helvítis helvíti!

júróvisjón

ja, þetta er ekki gæfulegt ástand, íslendingar hafa ekkert verið að deyja úr velgengni hingað til í júróvisjón en ég held að ég geti fullyrt það að aldrei hafi verið búað á íslenska lagið áður en það var flutt(kannski eftir á en ef svo er þá hefur það verið verðskuldað). Eitthvað hefur hún Sylvía elskan farið fyrir brjóstið á grikkjunum. Þetta er hálfgerð synd að hún fór svona herfilega yfir strikið í húmornum vegna þess að þetta er virkilega fyndið lag. En ljósi punkturinn í þessu öllu er að það er alveg sama hvað við sendum næsta ár það getur ekki fengið verri móttökur en í ár.
Ég var hrifin af Litháen,geðveikur húmor og svo náttúrulega finnsku orkarnir. En ég held að Úkraína taki þetta, ég hafði rétt fyrir mér með Ruslönu hérna um árið þannig að ég ætla að veðja aftur á sama hest. Eigiði gleðilegt júróvísjón!

Ásdís Skaðvaldur

Já, mér tókst að keyra aftan á bíl í gær, alveg ekta mánudagur. Bíllinn fyrir framan bremsaði dáldið harkalega og ég var ekki nógu vakandi. En það góða við að keyra um á plasthjóli er að maður nær ekki valda neinum skemmdum af viti, bíllinn slapp með rispu á stuðaranum. Scooterinn er pínu ljótari að framan, hann brotnaði aðeins en keyrir fínt. Ég er smá aum í skrokknum eftir höggið en það gengur fljótt yfir.
Ég keypti mér sólbrillur um daginn með styrk, ég hef ekki gengið með brillur í 2 ár núna. Ég týndi seinasta pari við grunsamlegar aðstæður. Þvílíkur munur, ég sééé!!!!. Ég rata mikið betur núna af því að ég sé nefnilega hvað göturnar heita núna. En málið er að það er dáldið fáránlegt að horfa á sjónvarp og lesa bækur með sólgleraugu. Það er rosa kúl, ég sé mjög skýrt en það er dáldið dimmt svona innandyra. Svo næsta skref er að kaupa venjulegar brillur!
Fór í viðtal í dag útaf skólanum og það gekk vel. Núna er bara að bíða til 28.júlí. Þá gerast stórir hlutir. Ég og minn heittelskaði erum í meiriháttar skipulagningu þessa dagana varðandi heimilisstörf, núna gerum við matseðil fyrir heila viku og kaupum inn EINU sinni inn í viku. Það er æði, ég var alltaf úti í búð hérna áður annanhvern dag og brjótandi heilann um hvað í andskotanum við ættum að éta þetta kvöldið. Núna er ég laus við þær pælingar, dejligt!

sumar

Það hefur verið ákveðið í ár að sleppa vorinu og fara beint yfir í sumarið. Það er búið að vera yndislegt veður og 20 stiga hiti í viku. Það er ekki hægt að keyra á scooternum með hanska, það er of heitt. Þetta er algjör snilld, trén eru að springa út í blómum, kirsuberjatrén og magnólíutrén eru svo falleg, ég gæti eytt heilum degi í að horfa á þau. Svo er komin þessi útlandalykt í loftið, svona heit gola með blómalykt. Æði!
Mér finnst alveg gífurlega gaman að brúnkuáráttu Dana, hér í landi er samasemmerki að líta vel út og vera brúnn. Ég hef tekið eftir fullt af fólki sem er grunsamlega dökk sólbrúnt svona í byrjun sumars, það er búið að liggja í sólarbekkjum svo að það sé hægt að taka sig vel út í stuttbuxunum. Ég á ekki mikinn sjens í brúnkukeppnina með mín kríthvítu gen og verð líklega eina hvíta manneskjan í Danmörku í sumar. Ég meina ,það verður einhver að vera það!
Ég ætla að fara að þvo stofugluggana, það sér ekki til sólar fyrir skít.

Pappírsbrúðkaup

Jæja þá er maður búin að þrauka 1 ár í hjónabandi, djöfull erum við dugleg! Þessi dagur verður nú alltaf merkilegri og merkilegri. Einn af mínum fastakúnnum Vagn Lund var að fræða mig um það í dag var Danmörk var frelsuð undan nasistunum í den tid. Vagn man vel eftir þessu, það var þvílík gleði!
Ég var vakin með blómum frá mínum heittelskaða og þar með hefur hann unnið sér inn bónusstig sem ættu að endast fram á haust. Ég væri reyndar alveg til í að vakna svona á hverjum morgni. Ef maður fær blóm í rúmið þá verður maður svakalega glaður.
Við ætlum að fara og borða besta sushi í heimi í kvöld og hygge okkur
knús

Sumarið komið!

Haldið ekki að sumarið sé komið í Baunalandinu. Það var 20 stiga hiti í dag,alveg ótrúlegt! Ég verð að fara að kaupa sumarföt bráðum. Hafið þið séð þátt sem heitir Felicity,undarlegur þáttur sem virðist snúast um samband tveggja háskólakrakka og vina þeirra. Ég sá þátt um daginn sem var bara absúrd, allir voru búnir að vera með öllum og voru í því að spurja hvorn annan hvort þeir mættu deita þeirra fyrrverandi sem þeir þó höfðu verið með áður. Afar undarlegt en þetta er eins og með bílslys, maður verður að horfa.
Fór á nýjustu Woody Allen myndina, og hún var bara helvíti góð, rosalega öflugir leikarar

yyyeeeeessssss!!!!!

Ég kemst í viðtal í skólann sem ég sótti um !!!! Djöfull er ég ánægð, núna er ég komin í 45 manna hópinn. Djöfull skal ég kjafta mig inn í þennan skóla!!!! ííhhhhaaaaaaa!!!!!

HÆ!

Þá er ég flutt! Núna vakna ég við fuglasöng á morgnana í staðinn fyrir umferðarnið, mjög huggó. Ég verð víst aðeins að útskýra hvar og afhverju og hvernig ég flutti hingað ,fólk er ekki alveg að fylgjast með. Það er líka dáldið snúið, ég er búin að flytja oft upp á síðkastið.
Sko! Við erum flutt til Rødovre(hræðilega erfitt að bera fram, það er búið taka mig ár að læra það). Rødovre er í áttina að Roskilde, svona sunnan megin í Köben, dáldið útúr en samt ekki. Það tekur mig 15-20 min að hjóla niður í bæ, 10 min með strætó. Íbúðin er í fjölbýlishúsi í rólegu hverfi og það er stórt vatn hérna við hliðina á, alveg hrikalega sjarmerandi. Við erum á efstu hæð(semsagt íslenskri þriðju) og íbúðin er að hluta til undir súð. Hún er 55 fermetrar og það er stofa og tvö svefnherbergi. Við erum hér af því að besti vinur hans Anders sem á íbúðina náði sér í konu með tvö börn (eða hún í hann, löng saga). Þau eru nýbyrjuð að búa saman og ef þau hanga saman í hálft ár á nýja staðnum þá ætlar besti vinur hans Anders að selja okkur íbúðina. Þetta er hlutaíbúð, svona svipað system og búseti bara 4 sinnum ódýrari leiga. Hluturinn kemur líklega til með að kosta 3 milljónir íslenskar og svo er það um 20.000 ísl í leigu á mánuði(sem er by the way ekki neitt!!!). Svo þurfum við að gera nýtt eldhús og bað og þá verður íbúðin rosa fín. Myndir eru á leiðinni!

Afsakið hlé!

Smá updeit hérna! Er að flytja á morgun til Rødovre á morgun, erum búin að fá hlutaíbúð sem við eigum möguleika á að kaupa eftir hálft ár þannig að við sjáum fram á að geta hætt að flytja. Við máluðum allt seinustu helgi þannig að það er allt voða hvítt og huggó, eldhúsið og bað eru reyndar algjör horror og það er ekkert við því að gera fyrr en við kaupum. Þá ætlum við að taka smá auka lán og gera nýtt bað og eldhús. Þar sem þetta verður framtíðarhúsnæði þá fáið þið myndir bráðum. Ég er ennþá að bíða eftir svari frá skólanum, heyri líklega frá þeim í maí.
Vorið er komið í Danmörkinni, spáin er 18 stiga hiti á mánudag. Úllalala!
Over and out!

Beta og Mikkel voru hjá okkur að spila Settlers, þetta er svo skemmtilegt spil. Það tók reyndar 2 ár fyrir mig að byrja að vinna einstaka leik en það skiptir ekki máli. Stundum verður maður bara að vera eins og maður sé að keppa í ungfrú Reykjavík og bara "vera með"! Ég og Beta áttum snilldarmove í gær þegar við rústuðum verslunarleiðinnni fyrir mínum heittelskaða. Hann var ekkert sérlega sáttur en svona er þetta bara. Amma Ásdís náði að halda sér vakandi til hálftvö í nótt með hjálp Settlers adrenalíns og helling af kaffi og þar afleiðandi að sofa til hálfníu í morgun! Dugleg

ammili!

Minn heittelskaði átti afmæli í gær, ég eldaði þessa þvílíku nautasteik handa honum, hún var ekkert smá góð. Svo var vídeókvöld dauðans, þar að segja til svona tíu, þá var hún amma Ásdís búin á því og þurfti að fara að sofa. Ég er ótrúleg, það slökknar á mér kl 10 á kvöldin ,ég er orðin gömul. Svo er það ótrúlega pirrandi, ég vaknaði kl hálfsjö í morgun, mig langaði svo að sofa út, ég bara gat það ekki. Þannig að ég hringdi í foreldrana, þau eru þau einu sem ég þekki sem eru vakandi á þessum tíma. Það er 10 stiga hiti á Íslandi, djöfull er þetta hallærislegt, það eru 0 gráður hér!

list og lífið

Fór á listasafn í gær , það gerist nú mjög sjaldan. Tilefnið var Rembrandt sýning sem ég fór að kíkja á með konu úr vinnunni. Við fengum fyrirlestur um málarann og verkin og þetta var þrælskemmtilegt. Ég fékk alveg nýja sýn á þetta allt saman, ég hafði aldrei pælt neitt sérstaklega í Rembrandt og afhverju hann er svona spes. Afhverju verður maður ekki snilli fyrr en eftir að maður drepst! Það eru tæplega 400 ár síðan hann málaði þessi verk og það slefa allir yfir þessu í dag og ég tala ekki um hvað verkin hans kosta. Bara þessi 20 verk sem voru á sýningunni kosta samanlagt milljarða í dag. Pant vera snilli í að mála og finna svo upp tímavél, það kann örugglega einhver að meta mig eftir 300 ár!!
En það var mjög gaman að gera eitthvað sem ég er ekki vön að gera og ég kíki pottþétt þarna inn aftur.

Loksins

Nú er umsóknin í skólann komin á áfangastað! Þvílíkur léttir, ég er búin að vera í þráhyggju út af þessari umsókn í mánuð og það hefur voða lítið annað komist að. Á endanum fékk ég Betu snilling systur mína til að skrifa hana fyrir mig, ég hefði átt að fatta það mikið fyrr. Ég er hreinlega ekki nógu sleip í dönskunni. Núna þarf ég bara að bíða fram í maí til að fá að vita hvort ég kemst í viðtal eða ekki. Spennó!
Ekkert nýtt að frétta af flutningum, flytjum kannski seinni part apríl. Það kemur allt í ljós. Ég er í svakalegum matarræðispælingum þessa dagana, ég er hjá biopata og það gengur vel. Ég var hjá henni áðan og er nú orðin candidalaus sem er ánægjulegt. Ég er að lesa "Borðaðu eftir þínum blóðflokk" og finnst þessi kenning áhugaverð. Og ég komst líka að því að ég borða nokkurn veginn eins og ég á að gera samkvæmt þessari bók án þess að fatta það. Ég virðist ekki fíla að borða þá hluti sem eru ekki hollir fyrir mína blóðtýpu sem er dáldið fyndið. Það var þvílíkt félagslíf hjá mér seinustu helgi, var út að borða með stórusystur og Kristínu Maríu frænku á föstudagskvöld, svo vorum við að hanga með sigrúnu tengdó, Ollu og Stulla á laugardags og sunnudagskvöld. Svo vorum við með hitt tengdafólkið og bróður Anders og konuna hans í mat í gærkvöldi. Brjálað að gera! Hér er ennþá fáránlega kalt, ég er farin að missa trúna á því að það hlýni nokkurn tímann. Ég er orðin ágætlega þreytt á þessu.

Oooohhhh!

Það er allt að gerast þessa dagana, við erum ekki búin að klára að taka uppúr kössunum og það er búið að bjóða okkur aðra íbúð, mikið ódýrari og með möguleikann á að kaupa seinna meir. Undir venjulegum kringumstæðum þá væru þetta gleðifréttir en ég hreinlega meika ekki einu sinni tilhugsunina um að flytja eftir 3 mánuði. Ég þarf alltaf ágætis tíma á milli flutninga til að geta gleymt því aðeins hvað það er drulluleiðinlegt að flytja. En við þurfum framtíðarhúsnæði og íbúðin sem við erum í núna er það ekki. Svona er þetta bara!

Ennþá allt í rúst,American Idol er tekið við af Beverly Hills, við eigum svo mikið drasl það er eiginlega ekki fyndið. Fólkið sem hjálpaði okkur með að flytja fékk brjóstklos bara við að sjá hrúguna sem þurfti að flytja á milli bæjarhluta. Annaðhvort okkar hjónakornanna er með söfnunaráráttu og það er ekki ég! Til dæmis komst ég að því að við eigum 5 borð, 1 stofuborð,2 borðstofuborð og 2 skrifborð og þetta fluttum við allt frá Íslandi. Þetta er nú eitthvað grunsamlegt og það er ótrúlegt að ég hafi ekki tekið eftir þessu þegar við fluttum á milli landa. Nýja íbúðin er að venjast en mér finnst skrýtið að eiga nágranna alltí einu og svo er svo mikill umgangur við götuna,það eru alltaf einhver hljóð í gangi sem ég er ekki vön.
Ég fór á kynningarkvöld hjá skólanum sem ég ætla að sækja og ég varð ennþá sannfærðari um að þetta er það rétta fyrir mig. Ef ég kemst ekki inn þá verð ég brjáluð. Á þessari kynningu sá ég þessa stelpu sem ég kannaðist við og ég var eiginlega pottþétt á því strax að þetta var íslensk stelpa. Ég fer og spjalla við hana og kemst að við vorum saman í Flensborg og svo þekkir hún vinkonu mína hérna úti og býr í gömlu íbúðinni hennar. Ég held að ég hafi aldrei hitt íslending í Baunalandi sem þekkti ekki einhvern sem ég þekkti. Við erum svo sveitó! Minn heittelskaði kemur heim á morgun og ég hlakka geðveikt til!

Hafernir

Það er svo langt síðan ég bloggaði seinast að það mætti halda að ég væri dauð. Ég er það samt ekki,bara dáldið þreytt. Við fluttum seinustu helgi og búum núna á Austurbrú niðri í bæ. Það er nú ekki oft sem að maður flytur í niður í bæ í stærri íbúð og sparar þvílíkt í leigu. En við vorum heppin. Það er allt í rúst í nýju íbúðinni og aðalástæðan fyrir því er að ég get ekki hætt að horfa á sjónvarp. Við keyptum sjónvarp þegar við fluttum eftir 8 mánaða fráhald og núna er rassinn á mér heftaður við sófann. Þeir eru að endursýna Beverly hills 90210 frá 1995,get ekki misst af því!
Annars er allt gott að frétta, ég er að vinna í skólaumsókninni þessa dagana,ég þarf að skila henni fyrir 15 mars. Ég þarf að skrifa meistarastykki um sjálfa mig sem lýsir því hversu æðisleg ég er og afhverju skólinn ætti að vera þakklátur fyrir að ég hef áhuga á þessu námi. Það er fínt í vinnunni, rólegt eins og venjulega. Minn heittelskaði er á skíðum í Svíþjóð með börnin í ungdómsklúbbnum þannig að ég er dáldið lónlý. En Beverly Hills reddar þessu! Ég lærði nýtt danskt orðatiltæki um daginn "að vera hress eins og haförn" þeir segja þetta í alvöru;). En ég veit ekki hvernig Danir hafa komist að því að hafernir séu hressari en aðrir fuglar. Hérna hljóta að liggja einhverjar rannsóknir að baki!

Allah

Jæja nú er þessari bloggleti lokið, ég er orðin kvefuð aftur og ég bara fatta þetta ekki. Það eru rétt komnar 3 vikur síðan ég var veik síðast. Þetta er reyndar aðeins mildari útgáfa af flensunni sem ég var með seinast þannig að ég býst ekki við ég liggi eins lengi núna. Úti er reyndar íslensk snjókoma þannig að þetta er ekki með öllu illt!
Hér er allt búið að vera að ganga af göflunum út af þessum teikningum. Danir eru orðnir óvinsælli en Bush í miðausturlöndum(og það þarf nú heilmikið til!). O g allt þetta vesen er vegna þess að einhver skítableðill á Norður Jótlandi ákvað að vera fyndinn eina helgina og gera grín að Múhammeð til tilbreytingar. Hér er búið að diskútera málið til helvítis, það er enginn fær um að diskútera eins lengi og ítarlega eins og Danir.
Ég hef oft kvartað yfir gúbbífiskaminni íslendinga, Davíð hækkaði skattana í dag en á morgun kjósum við hann samt af því að við erum búin að steingleyma hvað hann gerði í gær. En jákvæði póllinn í því er kannski að þá þurfum við ekki að hlusta á fjölmiðla nauðga sama málefninu í margar vikur.
En mér finnst persónulega að Norður Jótarnir hefðu aðeins átt að hugsa sig um áður en þeir gerðu þetta. Að sjálfsögðu hefur maður rit og tjáningarfrelsi til að birta næstum því hvað sem er. En það þýðir ekki að maður eigi að birta hvað sem bara af því bara"bara af því að enginn segir mér hvað ég má og ekki má".
Þeir voru örugglega ekki búnir að búast við því að þetta myndi setja eitt stærsta fyrirtæki landsins á hliðina eða hvað þetta myndi skapa mikla hættu fyrir Dani í útlöndum. En þeir hljóta nú að hafa búist við ansi hörðum viðbrögðum. En þetta snýst í rauninni ekki um þessar teikningar, teikningarnar voru dropinn sem fyllti mælinn. Þetta sýnir einfaldlega hvernig samskipti Dana og útlendinga(sér í lagi múslima) eru í þjóðfélaginu og ástandið er bara helvíti slæmt.

Glöð!

Æi hvað ég er glöð í dag! Ég mætti samviskusamlega í vinnuna í morgun og fékk að vita það að ég átti að vera á kúrsus í dag sem mér fannst ekkert nema sniðugt. Þannig að ég fékk að sitja inní í hitanum í dag og hafa það huggulegt að hlusta á fyrirlestra. Það gerist bara ekki betra held ég.
Ég ætla að rölta niður í bæ og kaupa andlitskrem, andlitið er við það að detta af mér vegna þurrks og kulda. Þegar eiginmaðurinn er farin að kommenta að maður líti ekki eins vel út eins og maður gerir vanalega(hann tekur aldrei eftir neinu) þá þarf maður að fara að gera eitthvað í þessu. Ég ætla að finna mér krem sem yngir mig um 10 ár og gerir mig geðveikt hamingjusama(þar að segja hamingjusamari:).
Það er örugglega ekkert mál!

brr!

Danskur vetur er ekkert grín, ég held ég hafi aldrei upplifað að hafa verið svona kalt áður. Og þó hef ég ágætis reynslu í vera kalt í gegnum þetta hjálparsveitabrölt á árum áður. Allar þessar vetrarferðir og útköll ,þar náði maður ágætis reynslu en það fölnar í minningunni miðað við veturinn hérna. Reyndar var þarna skiptið þegar Markús henti mér á bólakaf í Skógará í nóvember, það var helvíti kalt en það góða var að það stóð ekkert sérlega lengi. Danskur kuldi nístir í gegnum merg og bein, það hvarflar ekki að mér að fara út fyrir hússins dyr nema í neyðartilfellum, t.d að fara í vinnuna. Eftirlaun og að flytja til Kanarí hljómar alveg rosalega vel þessa dagana, það er bara verst að það eru minnsta kosti 33 ár í það!
Við hjónin erum að fara að skipta um húsnæði ,við flytjum 1. mars. Það vantar leigjendur í íbúðina sem við erum í núna .Ef þið vitið um einhverja greindarskerta íslendinga sem finnst það góð hugmynd að flytja til lands sem er kaldara en Ísland endilega láta vita!

Jæja,nú er horið að mestu búið og ég er farin að geta andað í gegnum nefið. Það finnst mér mjög gott, þetta er svona einn af þessum hlutum sem maður tekur sjálfsagðan dags daglega. Ég er búin að horfa á aðeins fleiri bíómyndir og verð að komast út úr þessari íbúð! Ég er búin að múta systur minni til að fara með mér út að borða í kvöld og bíó. Hún vorkenndi mér svo mikið að hún sagði já.

bíó

Er ennþá heima í horinu og yfirmaðurinn bannaði mér að mæta í vinnuna á morgun. Ég á að æfa mig á að fara út í búð og ryksuga stofuna á morgun, ef það gengur þá má ég kannski mæta um helgina!
Ég er búin að horfa á fáránlega mikið af myndum þessa vikuna og ég ætla að vera með smá kvikmyndagagnrýni.
1.Princess Bride: uppáhald, alltaf skemmtileg, geðveikt sexý aðalhetjan
2.E.T : náði bara helming, hún var eiginlega bara leiðinleg
3.Snatch : ágætis krimmamynd, hún fær auka stjörnu fyrir Brad Pitt beran að ofan í 3 atriðum
4.Danny the Dog: Hún var eiginlega mjög góð, ég vissi ekki að Jet li gæti leikið, blanda af hasar og mannlegu drama
5.Moulin Rouge: Uppáhald, búin að sjá hana svo oft, græt alltaf í endann
6.Evil: sænsk mynd sem er alveg svakalega góð, sætur leikari
7.American Pie, the bandcamp: Titillinn segir allt sem segja þarf,amerísk highschool mynd eins vond og þær geta orðið
8.Calendar girls: Bresk gamanmynd, skemmtileg kellingarmynd
9.The prince and me: amerísk ástarvella en sætir leikarar
10.Prozac nation: mynd um þunglyndi, mjög góð
11. The touch: hræðileg, meikaði korter og svo gafst ég upp

horfréttir

Ég er við það að fremja sjálfsmorð úr leiðindum og hori. Búin að horfa á allar myndir í tölvunni og les mbl.is á korters fresti. Ekki gott! Hvaðan kemur þetta hor allt saman og hvað er hor eiginlega? Einhvern tímann heyrði ég að hor væri dauðar kvefbakteríur. Ef svo er þá er ekki ein einasta kvefbaktería eftir í skrokknum á mér. Kannski er þetta heilinn á mér að leka út hægt og rólega. Ég er nú samt aðeins skárri í dag en í gær en það er alveg svakalega ömurlegt að hanga svona heima.

væliskítur

Svei mér þá, ég held að ég sé bara að deyja, ég er búin að ná mér í flensu dauðans. Ég var heima á föstudaginn og í dag, það gengur víst ekki að klína hor í gamla fólkið. Svona er þetta, ég er ekki búin að sleppa orðinu um hvað ég er búin að vera hraust síðan ég flutti til baunalandsins. Þetta fær maður í hnakkann um leið!
Týpískt!

Nýja árið leggst alveg svakalega vel í mig , ég er alveg rífandi hamingjusöm þessa dagana.
Skemmtilegt!

Gleðilegt árið!

Ég var að klára áramótaskaupið og það var nú bara helvíti fyndið. Fullt af ferskum leikurum, ég er bara ágætlega sátt. Hér er árið 2006 gengið í garð, flugeldarnir komnir á fullt og púðurlykt.
Ég var að kíkja á afrek ársins og ég er búin að vera dáldið dugleg.
1.Gifti mig og flutti á milli landa(bæði skuldlaust)
2. Lærði dönsku.
3.Komst að því að ég ætla aldrei að vinna sem póstberi!
4. Náði að vera góð við mína nánustu(svona 99%)
5. Náði ágætis hamingjuhlutfalli svona 85% en þarf að kyrja meira.

Nýársheitin 2006 eru:
1. Iðka meira
2.Vera óeigingjarnari á árinu
3. Fara í yoga

Gleðilegt ár öllsömul og þakka allt gamalt og gott. Þið eruð frábær. Skál!

Snjókorn falla!

Það snjóar bara í Danmörkinni, meira segja bara helling. Ég þurfti að skafa scooterinn til að komast heim úr vinnunni! Ég geri mér nú reyndar alveg grein fyrir að það er til fólk sem þarf að skafa fleiri fermetra en ég en samt! Ég vildi helst vera alveg laus við snjóinn.
Ég fékk nokkrar jólakortaeftirlegukindur í dag sem ég er mjög ánægð með. Þannig að það eru nokkrir lausir úr jólakortaskammarkróknum hjá mér. En það eru margir eftir þar inni!
Ég fór í danskt jólaboð í gær og það var hin besta skemmtun. Maður er rosalega lengi að borða af því að það eru svo margir réttir og það er líka minni hætta á að maður éti á sig gat. Systir mín kom með snilldarhugmynd um hvernig á að haga jólahaldi framvegis. Við stefnum að fara til Íslands annaðhvert ár og erum hérna hitt árið. Þannig að ég kem heim næstu jól!
Beta og Mikkel eru að koma til okkar í hangikjöt og spilamennsku í kvöld. Ég var að smakka það og það er geðveikt gott. Ég og Beta ætlum að taka drengina í nefið í Settlers í kvöld!

Afi lesa!

jólahjól!

Gleðileg jól öll saman annars! Ég er búin að eiga ágætis jól með önd og lífrænt ræktuðum nautalundum,mmm! Fékk fullt af sniðugu dóti í jólagjöf og ég held að þetta séu rólegustu jól sem ég hef upplifað, bæði aðdragandinn og jólin sjálf. Mér fannst dáldið erfitt að komast í jólaskap því að hérna eru hlutirnir ekki eins og maður er vanur að hafa þá. En við hlustuðum á messuna á rúv.is og þá datt ég í stemmingu. Ég fór að pæla í því í gær að ég hef aldrei hlustað á prestinn, bara hlustað á lögin. Ég vona að hann hafi ekki verið að segja neitt merkilegt síðastliðin 29 ár. Svo er ég búin að eiga letidag í dag, horfa á vídeó og vera í náttfötum. Beta systir og Mikkel voru að fara, við spiluðum Settlers. Mig langar að taka það fram að við Beta unnum í bæði skiptin! Yeeaaah!
Svo var hún litla systir mín að slá í gegn í háskólanum og fékk þessar frábæru einkunnir. Það mætti halda að hún sé skyld mér:)
Þessi mynd hér að neðan er af barnabarni fjölskyldunnar, hundi litlu systur minnar. Hún Doppa var í pössun hjá afa og ömmu á aðfangadagskvöld og fékk nýsjálenskar nautalundir(eins og sjá má á svipnum)

Barnabarnið!

Velsæld!

Ég hef akkurat ekkert annað betra að gera en að hengja upp jólaskraut heima hjá mér og horfa á vídeó. Þetta er mjög skrýtið ástand, ég er ekki með neinn lista í höfðinu sem mér finnst ég þurfa að gera. Ég er nú venjulega með svoleiðis í gangi. Það er bara algjör friður og afslappelsi í gangi. Ég á nú reyndar eftir að gera nokkra hluti fyrir jól en mér finnst ég hafa allan tímann í heiminum og það er nú afar furðulegt svona rétt fyrir jól. Ég er orðin ligegladari en andskotinn!

Baunajólin

Ég og minn heittelskaði vorum þvílíkt dugleg um helgina,tókum og þrifum íbúðina hátt og lágt,þvoðum þvott og ég veit ekki hvað og hvað. Síðan kíkti ég á byggðasafn bæjarins, þar var jólamarkaður og alls kyns sniðugt dót. Svo skoðaði ég nokkra krúttlega bóndabæi með stráþaki. Þetta var mjög huggulegt.
Danir eru mikið rólegri en Íslendingar í jólatíðinni og ég er búin að uppgötva hluta af ástæðunni. Ég fór í rúmfatalagerinn á Íslandi, þar var hálf búðin undirlögð undir jóladót. Ég fann jóladúka þar en svo fylltist ég danskri nísku og ákvað að fá þetta ódýrara í Nískulandinu. Svo kem ég heim og ætla að gera þvílík kaup. En svo er næstum ekkert jóladót í rúmfatalagernum hérna. Þvílík vonbrigði! Ástæðan fyrir því að Danir eru ekki jafnklikkaðir og íslendingar er einfaldlega sú að þeir hafa ekki nærri jafnmikið framboð á ónauðsynlegum hlutum til þess að kaupa. Svo gefa Danir ekki eins dýrar gjafir og íslendingar. Þannig að fjárhagur heimilisins fer ekki á hliðina útaf jólunum hérna. Sem er bara mjög skynsamt! En ég sakna ljósanna, þeir eru ekki duglegir við það hér.
Ég ætlast til að fá fullt af jólakortum, helst handföndruðum en ég neita ekki að lesa þau þó að þau séu keypt í Bónus. Hérna er adressan svo að þið getið látið til ykkar taka.
Ásdís Óladóttir eða Anders Larsen
Buddingevej 60
2800 Lyngby
Danmörk

Ásdís snilli, taka 2

Í dag er góður dagur, ég grætti engin gamalmenni og ég fékk 10 í munnlega prófinu.
Sem þýðir að ég get haldið áfram í dönsku eftir áramót(það þurfti 10 í meðaleinkunn). En þó það sé nú fínt þá er dönsk málfræði ekki það skemmtilegasta í heimi, ég held að ég hafi skrópað núna jafn mikið og ég mætti. En batnandi manneskju er best að lifa, hver veit nema að ég læri að læra heima eftir áramót :).
Ég upplifði mjög furðulegan hlut í dag, hausinn á mér eyddi lunganum úr deginum í að velta sér uppúr því hvað ég hefði átt að segja í prófinu til að standa mig betur þrátt fyrir að hafa fengið 10. Það er varla hægt að gera mikið betra en það . Ég er svo rugluð!

Ásdís snilli!

Dönskuguðirnir eru mér alveg fáránlega hliðhollir þessa dagana, ég fékk 10 og 13 í skriflega prófinu. Þetta á ég engan veginn skilið. Verð að muna að kaupa geit og slátra henni útí garði þeim til heiðurs.
Er komin með snert af brjósklosi eftir ferðina til Íslands. Foreldrar mínir versluðu jólagjafir eins þau hafi ekki séð okkur systur í 20 ár,svo var það hangilærið, grafni silungurinn, 2 kíló af nammi og hunangs cheerios pakkinn. Ekki misskilja mig samt, það er ekki hægt að fá of margar jólagjafir.
Það var dáldið skrýtið að koma til Íslands, myrkrið var dáldið sjokkerandi. En það vandist á svona 2 dögum. Þetta var alltof stuttur tími til að hitta alla sem maður vildi hitta og framkvæma allt sem maður ætlaði að gera. Það þarf að taka minnst 10 daga í þetta. En ég held samt að ég hafi náð því mikilvægasta, hinir fá bara jólakort í staðinn!
Ég fattaði líka eitt í Íslandsferðinni, ég skila aldrei kveðjum. Fólk var alltaf að biðja að heilsa hinum og þessum ,samt aðallega manninum mínum. Og ég gleymi þessu alltaf. Svo fór ég að pæla hvort að ég væri svona stjarnfræðilega mikill egóisti að ég gleymi öllu sem kemur mér ekki beint við. En svo getur líka verið að allir gleymi þessu eins og ég og það sé algjörlega merkingarlaust að biðja heilsa einhverjum eða segjast ætla að gera það.

Brrrr

Það er svo kalt í Danmörkinni að það er ekki fyndið. Það eru 0 gráður og mér finnst ég búa á Norðurpólnum. Mig rámar einhvernveginn ekki í að það sé svona kalt á Íslandi.
Prófið gekk fínt, ég hef ekki hugmynd um hvað ég fæ í einkunn en ég náði því og vel það. Ritgerðarefnið í prófinu fjallaði um að hvernig ætti að bæta heilbrigði almennings í landinu. Ég samdi þvílíka talibana fjallræðu um skaðsemi reykinga og hvað ætti að gera til að laga ástandið. Svo fór ég að pæla í því í morgun hvort kennarinn minn reyki og ég held að hún geri það. Svo reykir kannski prófdómarinn líka og svo verða þau ekkert sérlega ánægð með mig. Danir eru nefnilega ótrúlega viðkvæmir gagnvart þessari umræðu, pólítíkusar þora ekki að minnast á reykingabann nema að þeir séu leiðir á starfinu sínu og vilji ekki láta kjósa sig aftur. Það má nefnilega ekki skerða persónulegt frelsi reykingamannsins til að reykja nákvæmlega þar sem honum sýnist, sama hvort það fer á taugarnar á einhverjum öðrum eður ei. Þetta er svo klikkuð þjóð,Danir lifa víst líka skemur en aðrar norðurlandaþjóðir. Það er sígaretturnar, bjórinn og majónesið og trúleysið held ég.
Trúmál er líka ótrúlega viðkvæmt, hérna vill fólk frekar heyra mig tala um kynlífið mitt en trúna mína. Þetta er eina landið sem ég veit um þar sem er bannað að minnast á trú sína í starfsumsókn. Ég fékk fullt af atvinnuviðtölum heima út á búddismann, fólki fannst þetta ægilega spennandi. En hérna yrði ég örugglega rekin.
Ég sá alveg ótrúlegan hlut heima hjá eldri konu í dag, það var öskubakki skrúfaður í vegginn við hliðina á klósettpappírnum. Pælið í því að sitja á dollunni að skíta og reykja í leiðinni! Ótrúlegt! Það er eitthvað mikið að!

læseforståelse

Ég held að ég eigi skemmtilegustu systur í heimi, það var geðveikt gaman um helgina. Ég myndi taka þær með á eyðieyju. Ég er nú helvíti heppin því að það er til fullt af fólki sem finnst ættingjar sínir ekki það skemmtilegasta í heimi. Erna fór í morgun, ég þarf eiginlega að vinna í því að hún flytji til Danmerkur.
Ég er ægilega klár, ég fékk 13 í æfinga lesskilningsprófinu. Svo er það alvara lífsins ámorgun, aðalprófið er kl.9 í fyrramálið. Þetta á eftir að ganga fínt.
Ég er að upplifa það að ég sé of góð í vinnunni minni. Ein eldri daman sem ég er hjá fær þunglyndiskast þegar ég er í fríi í vinnunni. Hún verður svo skelfilega leið þegar ég á fríhelgi en hún er reyndar dramadrottning dauðans. Svo byrjaði íslensk kona í vinnunni í dag, hún heitir Þórunn og það er bara ekki sjens fyrir greyið Danina að bera þetta fram. Ásdís er slæmt en Þórunn! Ég myndi bara breyta því í Tóta.
Úps! Ég fór með poka út í búð í gær en það var reyndar óvart. Þar fór það!

Kellingarhelgin mikla

Þetta hefur farið sómasamlega fram hingað til. Fórum í Lyngby Storcenter í gær og fórum svo út að borða á mexikóskan veitingastað. Við vorum alveg búnar á því eftir það og fórum snemma heim. Það getur tekið á að tala svona mikið og ég tala nú ekki um ef maður þarf að gera eitthvað annað í leiðinni eins og að labba. Þessi goðsögn um að konur geti gert fleiri en einn hlut í einu er bara bull. Ég get ekki labbað hratt og talað í einu.
Svo byrjuðum við daginn á risa brunch heima hjá Betu,beikon,egg,pönnukökur og det hele. Svo fórum við á risa flóamarkað þar sem hún litlasystir mín, föndurdrottning norðursins tapaði sér algjörlega. Við fundum föndurbásinn og hún byrjaði að froðufella af gleði. Það er bara eins gott að hún á ekki við blóðþrýstingsvandamál að stríða annars held ég að þetta hefði riðið henni að fullu. Ég hef bara aldrei séð hana svona upprifna áður, hún verslaði hálfan básinn og fékk slatta ókeypis því að hún var svo góður kúnni. Hún á eftir að falla í Háskólanum af því að hún verður að föndra jólakort.

Ásdís fiskibolla

Maðurinn minn elskulegur eldaði fiskibollur handa mér í kvöld og þær runnu ljúflega niður. Síðan arkaði ég glöð í skólann, svo fór ég úr jakkanum og upp reis þessi hrikalegi fnykur. Ég lyktaði eins og fiskimjölsverksmiðja, ég var búinn að gleyma hvað fiskibollufnykur festist í fötum. Það eina sem ég gat gert var að renna upp vindþéttu flíspeysunni og vona að hún kæfði þetta svona aðeins. Þau voru nú voðalega vinaleg, stelpan við hliðina á mér sagðist finna til svengdar við lyktina af mér og þýski strákurinn sagði að þetta væri voða íslensk lykt. Þetta er svo pínlegt að vera að kæfa aðra og sjálfa mig úr fýlu.
Burtséð frá þessu þá var þetta ágætis kvöld, ég fékk 8 í æfingaskriftarprófinu þrátt fyrir að fyrir að hafa beitt þeirri frægu " læra ekki rassgat heima allt haustið" aðferðinni. Hvenær ætli ég læri að læra heima?

Haustið er alveg óendanlegt hérna, það eru ennþá lauf á trjánum og grasið er grænt. Mjög skrýtið, svo verður bara vetur í 4 mánuði frá des fram í mars. Ekki leiðinlegt! Ég finn mikinn mun á birtunni hér, ég verð ekki eins þung og heima. Hérna er ennþá bjart kl 7 á morgnana.
Erna litlasystir ætlar að koma í helgarferð núna um helgina. Það verður alveg svakaleg kellingarhelgi, hanga í búðum og borða á veitingastöðum. Vitið þið að orðið "kelling" er alveg geðveikt ljótt í Danmörku. Ef þú kallar danska konu kellingu þá færðu einn á lúðurinn eða þaðan af verra. Ég er komin með mikin fiðring útaf Íslandsferð, ég hlakka til að hitta fjölskyldu og vini og komast í mömmumat. Mömmumatur er besti matur í heimi.

tímateppa

Ég aulaðist niður í Köben á annatíma í morgun. Það var það mikil umferðarteppa að menn sátu á umferðareyjum og dreifðu dagblöðum svo fólki leiddist ekki! Það keyra tugþúsundir manna inn í Köben á hverjum morgni til þess að vinna. Er þetta nútímalífið? Fólk eyðir 2-3 tímum á dag í bíl til þess að eiga fyrir lífinu sínu. Ég vona það þeirra vegna að vinnan þeirra sé þess virði að leggja svona mikið á sig. Mér finnst nú þessum tíma betur varið í eitthvað annað eins og að eyða honum með fjölskyldunni.
Ég veit ekki hversu skemmtileg vinnan mín þyrfti að vera til að ég gerði þetta. Kannski ef ég bjargaði 15 börnum frá hungri í Sómalíu bara með því að mæta í vinnuna. Jú ætli það ekki.

Ég er í áfalli! Maðurinn minn er búinn að raka af sér skeggið! Þetta er sko ekki maðurinn sem ég giftist!

Lesbíska jólaframhjáhaldið!

Haldið þið ekki að ég sé komin í skemmtinefnd fyrir jólahlaðborðið sem ég ætla ekki á! Ég er snilli, við vorum á fundi í dag, framhjáhaldið var svosum ekki rætt en þetta er örugglega þögult samkomulag um svoleiðis hluti. Reyndar er mjög erfitt að halda framhjá því að það vinnur bara einn karlmaður þarna og hann er næstum því kona. Maður verður þá bara að halla sér að sama kyni. Ég er agalegur pervert í dag, snúum okkur að öðrum æðri og andlegri málefnum. Ég er með skóþráhyggju, er búin að velta mér upp úr því hvort ég eigi að kaupa ákveðna skó í 3 daga. Mér finnst þeir nefnilega dáldið dýrir. Agaleg vandamál í þessu lífi!

Það hefur hægst mikið á blogginu hjá mér að undanförnu, aðallega vegna leti og svo líka að ég er komin í rútínu með vinnu og svoleiðis. Ég skrapp reyndar til Svíþjóðar á sunnudaginn í ljósgjöf, Svíþjóð er gífurlega krúttleg, sérlega húsin og svo er svo fyndið að hlusta á fólk tala. Svo var líka ánægjulegt að sjá sjóndeildarhringinn á Skáni. Þessi tré hérna í Baunalandinu koma nefnilega í veg fyrir slíkt. Eins og sönnum íslendingi sæmir þá verð ég að sjá langt frá mér öðru hvoru. Ég átti hálfs árs án sykurs afmæli um daginn og svo er ég búin að vera án brauðs í eina og hálfa viku. Það gengur ótrúlega vel, ég hef aldrei borðað eins flottan mat á ævinni.
Ég fíla vinnuna mína ofboðslega vel, það er mjög góð tilfinning að vinna við eitthvað þar sem ég geri eitthvað fyrir aðra. Það er svona þemavika í dag,við sátum í tvo tíma og diskúteruðum vinnuna og hvað er hægt að gera betur. Við gerðum leikfmi í gær og sungum morgunsöng í morgunsárið. Þið kannist örugglega við þetta, þetta er eitthvað sem háskólamenntuðu fólki í starfsmannahaldi dettur í hug og finnst alveg gífurlega sniðugt.
Mér og minn heittelskaði erum ægilega heppin þetta árið. Við föttuðum að með því að fara til Íslands í nóvember þá sleppum við julefrokostinum í vinnunni. Því að það er víst gömul hefð í Baunalandi að halda framhjá makanum í jólahlaðborðinu. Þannig að við sleppum við hjónaskilnaðinn þetta árið! Hjúkk!
Ég og minn heittelskaði erum einnig að pæla í að flytja út í sveit á næstu árum. Ég væri alveg til í hús út í sveit sem er svona hálftíma til klst frá Köben, hafa eplatré og kartöflur í garðinum, rollur og hænsni og eitt stykki hest. Það er hálfgerð geðveiki að kaupa sér eitthvað innan borgarmarka, við fengum mesta lagi 3 herbergja íbúð á leiðinlegum stað miðað við okkar tekjur. Það þarf líka að nýta þessa bóndamenntun af Hvanneyri sem Anders hefur í eitthvað. Það væri samt best að gera þetta með einhverjum og við eigum slatta af vinum sem hafa áhuga. Þá verður maður ekki alveg eins einmana. http://www.home.dk/sag/201-2933?fromSite=Boligsiden. Hérna er hús sem okkur finnst girnilegt.

Eru þau ekki sæt!

Litli prins

Krónprinsinn var sýndur í vikunni í fyrsta skipti opinberlega. Það voru þvílík herlegheit kringum þetta, bein útsending og ég veit ekki hvað og hvað. Mary leit alveg ótrúlega vel út miðað við að hún fæddi barn á laugardaginn En maður hefur víst ekkert val um að líta eitthvað öðruvísi út ef maður er prinsessa. Ég er alveg rosalega skotin í kóngafjölskyldunni, ég er aðeins farin að skilja afhverju það eru 3 tímarit helguð konungsfjölskyldunni í þessu landi. Það er viss glamúr yfir þessu. Ég ætla að kíkja á bókasafnið og finna einhverjar kóngabækur.
Ég held að ég sé að verða dönsk, ég skammaði Anders um daginn á dönsku og svo velti ég því fyrir mér að taka poka með mér útí súpermarkaðinn. Þegar ég geri það einn daginn þá er síðasta vígið fallið.
Mamma átti afmæli á miðvikudaginn og hetjan ég mundi eftir því. Það er svo furðulegt að mér finnst foreldrar mínir ekkert eldast, þau eru búin að vera jafngömul í 10 ár. Móðir mín elskuleg á nú hrós skilið, hún nennti að ganga með mig í níu mánuði og ala mig upp eftir það. Uppeldið var nú stærsta afrekið því ég var nú ekki sú auðveldasta. En hana hefur örugglega ekki grunað hversu skrýtin ég ætti eftir að verða seinna á lífsleiðinni. En það byrjaði ekki fyrr en eftir að hún hætti að ala mig upp, þannig að það er algjörlega á mína ábyrgð.
Ég fór á þá fyndnustu mynd sem ég hef séð í gær "The 40 year old virgin". Hún er kannski komin og farin á Íslandi. Þið verðið að sjá þessa mynd!

brrrrr!

Það er opinberlega komið haust í Baunalandi og það er skítakuldi. Það er búið að vera brjálað útstáelsi á mér um helgina,var í kveðjupartíi hjá Jóhönnu plastfrænku í gær. Hún er að flytja til Parísar á morgun og ætlar að að sjarmera frakkann upp úr skónum. Svo var ég að föndra með Betu í dag og svo fór ég á fund.
Ég er ekkert smá glötuð, Erna litlasystir átti afmæli í gær og ég gleymdi því. Það er ekki eins og ég eigi margar systur, ég á nú að geta haft stjórn á þessu. Ég vinn víst ekki "Best sister of the year award" þetta árið. Þar fór það! Ég er bara með eina afsökun af viti, danski krónprinsinn fæddist á laugardaginn og mér varð svo mikið um að ég gleymdi Ernu.
Ég er í vetrarfríi í dönskuskólanum þessa vikuna og finnst það mjög ljúft. Ég er ekki alveg að fatta þetta, við erum búin að tala um danska pólitík í mánuð og það er svo leiðinlegt. Afar tilgangslaust þegar tekið er tillit til þess að það er enginn í bekknum með atkvæðisrétt.

Langlífi!

Ég var að tala við konu í dag sem er 100 ára gömul. Hún var orðin dáldið þreytt á þessu og þakkaði(eða ekki!) háan aldur mikilli hreyfingu, reykleysi og hóflegri áfengisneyslu. Þannig að maður verður að passa sig að vera ekki of healthy, þetta gæti endað í því að maður lifi lengur en maður nenni.
Lífið mitt er svo frábært þessa dagana, ég veit svei mér þá ekki hvað ég gæti beðið um meira. Jú reyndar, ýsu, rosalega væri ég til í ýsu. Fiskneyslan er fyrir neðan allar hellur síðan ég flutti hingað. En það er nú bara lúxusvandamál.
Ég ætla að eyða kvöldinu í að sauma jólakort. Stórt knús til allra!

sól, sól skín á mig

Alveg ógeðslega var leiðinlegt í skólanum í kvöld, þessi kennari gæti svæft spíttfíkil. Annars allt fínt að frétta, hér er ennþá bongóblíða. Ég sat með Betu systur úti á kaffihúsi í dag og við sleiktum sólina. Það var allt fínt að frétta frá Skotlandi, þar er allt við sama heygarðshornið, óvenjulega mikið af ljótu fólki miðað við höfðatölu og egg og beikon í öll mál.
Inga Þyri frænka var víst að meika það áfram í Idolinu heima. Til hamingju með það elskan! Það getur verið hagkvæmt að eiga fræga ættingja seinna meir. Ég ætla að elda íslenska rollu handa systur minni á morgun og hafa það huggó.

Mér tókst að eyðileggja líf gamallar konu í dag. Ég fór að versla fyrir hana og það voru ekki til jógúrtbollurnar sem hún vildi í búðinni. Hún var alveg miður sín og horfði á mig eins ég hefði drepið uppáhaldskettlinginn hennar. Svona getur þetta verið, vonandi verður hún búin að jafna sig á morgun.
Beta systir skrapp til Skotlands að leita að Loch Ness skrímslinu og drekka sig fulla að sjálfsögðu. Það er viðurkennd staðreynd í Skotlandi að það er auðveldara að koma á auga á Nessie undir áhrifum. Það er eins gott að hún komi með myndir heim.
Í Danmörku er ennþá funhiti og haustið rétt að byrja. Það hefur víst verið snjór uppí eyru heima undanfarið, ég er voða fegin að sleppa við það.

Hamingja!

Ég er alveg ógeðslega hamingjusöm í dag!
Vildi bara láta ykkur vita.

Vinnan mín er svo friðsæl, ég held að ég hafi aldrei verið í vinnu þar sem er svona mikil ró og friður. Ég tek varla eftir því að ég sé að vinna, ég er bara að spjalla allan daginn. Ég er ægilega ánægð með þetta enn sem komið er.
Ég hef tekið eftir því að hér er mikið fleira eldra fólk á ferli en heima og hef verið að pæla afhverju. Ég held að það sé útaf því að hérna dettur engum í hug að vinna fram yfir sextugt og svo er það bara að dingla sér. Íslendingar taka þetta aðeins öðruvísi, þeir hætta útkeyrðir 67 ára með sjöfalt brjóstklos, með slitgigt og líkþorn á öllum tám. Talandi um Ísland þá ætla ég að heiðra klakann með nærveru minni frá 29.nóv til 5.des. Þið getið byrjað að hlakka til núna!
Annars er ég dáldið heltekin af jólaföndri þessa dagana, mig hlakkar geðveikt til jólanna. Ég fann þessa fínu handavinnubúð niðri í bæ og stefni á að eyða peningum þar eftir helgi.

Ég og Sigga tækluðum restina af flóamarkaðnum í gær og komumst að því að við erum stórhættulegar saman. Það er gífurlega efnahagslega óhagkvæmt fyrir okkur að versla saman, við töldum hvor annari trú til skiptis um að þetta væri algjörlega nauðsynlegt sem okkur langaði í og þetta væri nú svo ódýrt!! Það er kominn halli á fjárlögin eftir þessa ferð. Svo fórum við í bíó í gærkvöldi á Kalla og súkkulaðiverksmiðjuna, Johnny Depp er svo frábær í þessari myndi, mæli með henni. Er að pæla að skipta um au pair, sigga er ekki búin að vaska upp einu sinni síðan hún kom! Þetta er engin frammistaða.

fló!

Loksins er uppvaskari nr.2 kominn, Sigga vinkona átti í mestu vandræðum með að komast útúr Svíþjóð í dag vegna verslunaráráttu(ekki hennar samt!). Við fórum beint á risaflóamarkað, hann var það stór að við komumst bara yfir 1/3 í dag og ætlum að gera aðra atlögu á morgun. Við fórum á dáldið föndurfyllerí og fylltum á lagerinn fyrir jólaföndrið. Svo fórum við á tíbetskan veitingastað og borðuðum afar góðan mat. Það er búið að vera geðveikt veður í dag 20 stiga hiti og yndislegheit. Ég ætti kannski alltaf að vera með gesti,sólin virðist skína þegar það sefur einhver í stofunni hjá mér.

Ódýrt!

Ég er komin með dáldið danskt verðskyn núna en það er tveir hlutir sem ég missi mig algjörlega ennþá yfir. Það eru slúðurblöð og kjöttilboð. Ég kaupi slúðurblöðin bara vegna þess að þau eru fjórum sinnum ódýrari hérna en heima. Ég græt líka yfir kjöttilboðum í stórmörkuðum vegna þess að ég á svo lítinn frysti. Ég verð algerlega vitstola þegar ég sé 10 kjúklinga á 1600kr íslenskar og ég get ekki keypt þá út af frystinum. Ég ætti kannski að vera þakklát fyrir litla frystinn minn annars ætti ég heila nautgripahjörð og kjúklingabú í frystikistunni. Núna verð ég allavegana að éta úr frystinum til að búa til meira pláss.
Vinnan er mjög skemmtileg, hitti fullt af krúttlegu fólki og er komin heim kl 15 á daginn. Svo vinnur maður bara 35 tíma. Ekki slæmt!
Sigga vinkona kemur á laugardagsmorgun og svo málum við bæinn rauðan um helgina.

Vinnan lítur vel út, þetta er voða rólegt og afslappað. Ég fæ nýtt hjól(meira að segja flott merki),hjálm, bakpoka,regnföt og endurskinsmerki, það á sko ekkert að koma fyrir mig í umferðinni. Mér líst mjög vel á fólkið þarna ,góður mórall og svo framvegis.
Svo fíla ég bara eldra fólk, mér finnst æðislegt þegar fólk gerir nákvæmlega það sem því dettur í hug þó að það sé komið á aldur. Aldís vinkona á ömmu sem stingur af ein til Kína þegar henni dettur það í hug.

Skemmtilegheit

Rosalega borgar sig að vera skemmtilegur. Ég fékk vinnu í heimahjúkrun, byrja á mánudag kl.8. Það verður gott að hafa reglulegan vinnutíma.

Barnalán!

Það hrynja inn börnin þessa dagana, María systir hennar Siggu var að eignast litla stelpu, Goggi var að eignast strák og svo má ekki gleyma Britney Spears sem var að eignast strák í vikunni. Ægileg hamingja! Talandi um börn, þá hef ég verið að vinna á leikskóla í afleysingum í vikunni. Ég hef bara ekki upplifað eins erfiða viku ever. Ég tala nefnilega ekki barnadönsku og þau horfa bara á mig eins og ég sé fáviti. Það kom ein lítil til mín um daginn og sagði að hún þyrfti að búa til pulsur. Ég fatta ekki neitt og það tekur mig heillangan tíma að fatta að barnið ætlar að fara á klósettið að kúka. Þetta kenna Danir börnunum sínum "að búa til pulsur"!!! Hvað er eiginlega að þessu fólki? Ég er búinn að missa varanlega lyst á pulsum.
Ég hef verið að pirrast yfir hvað atvinnuleit gengur hægt en ég fékk mjög áhugavert svar við umsókn um daginn. Í bréfinu stóð að ég hefði semsagt ekki fengið starfið og það hefðu 196 manns sótt um starfið. Ég tek það fram að starfið var aðstoðarmanneskja á leikskóla. Ég finnst það bara ekkert skrýtið núna að ég hafi ekki fengið starfið. 196 manns! Það ætti kannski að láta Dani vita að það er mannekla á íslenskum leikskólum!
Ég fór reyndar í viðtal í morgun og ég er nokkuð pottþétt um að fá vinnuna, ég var svo rífandi skemmtileg í viðtalinu þó að ég segi sjálf frá. Ég fæ að vita það í fyrramálið.
Uppvaskarinn minn fór heim í morgun,sniff. Núna verð ég að gera eitthvað í eldhúsinu sjálf. En þetta er allt í lagi, það er tæp vika í næsta uppvaskara.

Himneskt!

Ég og uppvaskarinn minn fórum í dekurbað í dag í Frederiksbergs sundlauginni. Við vorum þar í 3 tíma og þetta var svo gott. Það var heitapottur með nuddi, saltvatnspottur, nuddsturtur, sítrónugufa, myntugufa,olíuböð, nuddstólar og ég veit ekki hvað og hvað. Síðan endaði maður sæluna með því að skrúbba sig allan uppúr olíu og salti. Það er mjög erfitt að slaka svona mikið á, ég er alveg búin á því!

Dejlig weekend

Minn heittelskaði bauð mér út að borða á föstudagskvöldið á japanskan veitingastað og þar fékk ég það rosalegasta sushi sem ég hef smakkað. Ég man bara ekki eftir því að hafa orðið svona agndofa yfir mat áður, sushiið var svo gott að ég var hreinlega hissa. Hver biti var opinberun! Ég fer þarna pottþétt aftur
Svo var mér boðið í grill á laugardagskvöldið hjá gömlum björgunarsveitarfélögum( ekki það að við séum eitthvað gömul, heldur er bara langt síðan við byrjum í björgunarsveitinni). Þekkjandi mína menn ágætlega, þá mætti ég með ananas á grillið svo að það væri eitthvað jurtakyns að borða og bjargaði þeim þar með frá skyrbjúg. Salat og annarslags græn vitleysa er nefnilega bara fyrir kellingar! Hvað er þetta eiginlega með menn og kjöt og svo konur og salat!
Svo var kvöldinu eytt útí garði við gítarundirspil og rifjaðar upp gamlar fylleríssögur og skandalar sem maður er sem betur fer löngu hættur að gera. Ég vona það allavegana. Þetta var rosalega notalegt kvöld og ég náði að halda mér vakandi fram yfir miðnætti sem er mjög öflugt af minni hálfu.

Au pair

Ég er að fatta hagkvæmni þess að hafa gesti, Linda er búin að vera vaskandi upp síðan hún kom sem mér finnst alveg æðislegt. Ég er eiginlega dáldið leið yfir því að hún fór til Þýskalands, núna þarf ég að vaska upp sjálf. Svo kemur Sigga eftir tvær vikur og ég læt hana ryksuga líka. Svo þarf hver gestur eftir það að toppa það sem síðasti gerði. Það verður þá ægilega hreint hérna um jólin!

Letidýr!

Það er komið sumar aftur í Danmörku, 24 stiga hiti í dag. Ég og Linda vorum að kafna og gerðum fátt lítið af viti nema að sitja á kaffihúsi og sólbrenna. Reyndar fórum við í siglingu en það var bara af því að við gátum setið á rassgatinu. Það er alveg brjálaður gestagangur, tengdó kom í dag og Bjartur kemur á morgun. Nóg félagslíf framundan sem er ekkert nema sniðugt.

Dönskuséní!

Ég er byrjuð í dönskuskóla og ég er bara nokkuð klár. Öll þessi ár í barna og framhaldsskóla þar sem maður kvartaði mikið undan hverskonar þrældómur það væri að þurfa að læra dönsku eru að skila sér núna. Ég hefði nú aldrei trúað því þá að það ætti einhvern tímann eftir að gagnast mér þetta dönskunám. Ég er alveg þvílíkt heppin, ég sé það að fólk frá öðrum löndum eins og Búlgaríu og Afríku á í alveg svakalegu basli, jafnvel eftir mörg ár í skóla. Ég tek 9.bekkjarpróf í dönsku í nóvember og svo er það stúdentsprófið í vor.
Mér gengur alltaf betur að tala en mig vantar aðallega orðaforðann. Ég verð orðin fín um jól. Talandi um jól þá var ég að heyra að vinkonurnar heima eru að fara að byrja á jólaföndrinu. Það er nú ekki seinna vænna. Ég verð að fara að byrja að sauma út jólakortin fyrir þessi jól. Það fengu færri en vildu á seinasta ári vegna framleiðsluleysis af minni hálfu.
Ég kem ekki heim um jólin, jólin verða víst dönsk þetta árið mínus snafs og svínasteik.

Sýndarmennskan í hnallþórunum!

Ég er eiginlega búin að komast að þeirri niðurstöðu að þessi tendens til að baka ægilega mikið af kökum og þrífa allt hátt og lágt þegar ég er með gesti er bara sýndarmennska. Ég er bara hrædd um hvað fólk heldur ef ég geri það ekki og svo vil ég fá klapp á bakið fyrir kökubakstur. Ég vil ekki að fólk haldi að það sé eitthvað að þannig að það verður allt að vera voða fínt á yfirborðinu. En staðreyndin er sú að það er nú yfirleitt drasl hjá mér(nema þegar koma gestir) og heimilislífið mitt er ágætlega heilbrigt. Kannski ætti ég bara hætta að standa í þessu , hafa óhreina þvottinn á sófanum og gefa fólki myglað matarkex og sykurlausan appelsínusvala. En ætli fólk myndi þá ekki hætta að nenna koma til mín!
Það sem ég er að reyna að koma orðum að er að það eru svo margar óskrifaðar reglur sem eru í gangi sem maður hlýðir ósjálfrátt. T.d að vinna nógu djöfulli mikið þá reddast þetta!, borga reikningana á réttum tíma, kaupa hluti sem maður þarf ekki vegna þess að hinir eiga svoleiðis, vera í vinnu sem öðrum finnst flott,eiga fínt heimili, garð,bíl og mann og ég tala nú ekki um börn sem koma vel fyrir út ávið og alls ekki viðurkenna að það sé ekki allt í gúddí inn á heimilinu. Álit annara getur haft gífurleg áhrif á gjörðir manns.
Sem betur fer verður maður frjálsari fyrir þessum hlutum eftir því sem maður verður eldri en ég er greinilega ekki ennþá orðin frjáls fyrir marengstertunum. Svo finnst mér reyndar gaman að baka.